Gelgjurnar slógu öll fyrri met

Gelgjurnar geðþekku, Eva María og Ragnhildur Steinunn, slógu öll sín fyrri persónulegu met í ungæðingslegum fígúruhætti í Evruvísíjóninu í kvöld með framgangi sem lengi verður í minnum hafður. Þær voru ekki einasta sigurvegar kvöldsins, heldur féllu lögin í keppninni svo gersamlega í skuggann af djöflagangi gelgjanna, flissi og fretum, að enginn man hvaða tónverk voru þar í boði og enn síður hvort nokkurt þeirra hafi unnið. Það hlýtur því að dæmast á Evu og Ragnhildi bera frægð Íslands út yfir höfin þegar kemur að aðalhátíðinni í Noregi í vor. 

Því er svo við að bæta, að Snata mínum, sem er tónelskur hundur að eðlisfari, blöskraði svo gauragangurinn í fyrrenfndum gelgjum, að hann lagði niður skottið, varð áberandi sorglegur til augnanna, og skreið, eins og húsbóndi hans hefði lamið hann, bak við sófa og faldi sig þar uns þætti Evu og Ragnhildar lauk.

Hera Björk fulltrúi Íslands

Athugasemdir

[Aðalsteinn Tryggvason, 6.2.2010 kl. 23:26]

Lag Örlygs Smára og Heru Bjarkar, Je ne sais quoi, sem Hera Björk syngur í söngvakeppni Sjónvarpsins og lítt þekkt lag sem söngkonan Kate Ryan syngur, Who do you love, eru vægast sagt mjög lík.

Umræður um hvað lögin eru óþægilega lík eru eldheitar á internetinu.

[Anna Einarsdóttir, 6.2.2010 kl. 23:32]

Eurovision er orðið stærra vandamál en Icesave. 

[Jóhannes Ragnarsson, 6.2.2010 kl. 23:43]

Sem stendur er Evruvísjíjónið mikið stærra vandamál en Icesave-slettan þó bölvuð sé.

Ég þakka Aðalsteini fyrir að upplýsa að eitt lag hafi þó komist að þrátt fyrir atganginn í stelpuskjátunum.

[Sveinn Elías Hansson, 7.2.2010 kl. 00:03]

Það er eins með þetta evróvisjón rugl og icesave. Þetta virðist engan enda ætla að taka.

Því er nú verr.

[Sigurður Sveinsson, 7.2.2010 kl. 05:14]

Kötturinn minn greip til eyrnatappanna. Mér líst mjög vel á að stöllurnr verði látnar reka við í Noregi.