Félagi Ólafur sópar tugum frambjóðenda útaf borðinu á einu andartaki

Þá þarf aunginn að ganga að því gruflandi að félagi Ólafur Ragnar ætlar að halda áfram að vera forsetinn okkar; í einu vetfangi sló hann þá tugi frambjóðenda, sem annaðhvort voru búnir að lýsa yfir framboði og þá sem hugðust gefa kost á sér, útaf borðinu eins hvern annan skorkvikindasverm. Víst er að þessi ákvörðun félaga Ólafs veldur ólánlegum krataskitum hrottafengnum sálarkvölum og niðurgangi, og þeir munu tala tungum og froðufella í skapbrestaorgíu um stræti og torg, en ekki síst á netmiðlum og öðrum mannamótum netheimsins. Það nagg og geðveikissarg líkist mest óhljóðum fordæmdra í ríki Sathans, og eiginlega bara allt gott um það að segja.

Eflaust verður félaga Ólafi brugðið í gríð og erg um að hann hafi verið klappstýra útrásarvíkinganna. Því er til að svara að til dæmis gerðist heill stjórnmálaflokkur, Samfylkingin, ofsafengin klappstýra nefndra víkinga og aldrei var tryllingur þeirra ákafari en tvö síðustu árin fyrir Hrun. Af þeim sökum verður hatursfengið grenj öfugugga af kratakyni að forsetanum að einkar ótrúverðugu og hjáróma útburðarvæli á þessari stundu.

Krataeðlið, sem er eineggja systkyni framsóknarvírusins, er óværa sem komið hefur óbætanlegu óorði á alla pólitík, en þó einkum og sér í lagi á vinstripólitík, með inngrónum tvískinnungi sínum, tilgerð, minnimáttarkennd og kostulegum sleikjuskap við allt auðvald sem á vegi þess verður. Sú var tíðin að krataskepnurnar studdu félaga Ólaf Ragnar, allar sem ein, til forseta. En þegar villilýður krataeðlisins ætlaði að láta höndur standa fram úr ermum, meðal annars með því að lauma framsalsákvæði inní stjórnarskrá landsins svo hægt væri að svæla sjálfstæði og fullveldi þjóðarinnar þegjandi og hljóðalaust undir vald auðvaldsins i ESB, en varð fyrir því óláni öðru óláni stærra, að forsetinn brá fæti fyrir þær fyrirætlanir með því að vísa Icesavemálinu til þjóðarinnar í atkvæðagreiðslu, þá snerust kvikindin öfug við í roðinu og beindu hatri sínu óskiptu að honum.

Ólafur aftur í forsetaframboð

Athugasemdir

[Aztec, 18.4.2016 kl. 18:04]

Satt er það. Annars var það nú viturlegt af Össuri að bíða með að bjóða sig fram þar til hann var viss um hvort félagi Ólafur myndi bjóða sig fram eða ekki. Því að hver vill Össur, þegar Ólafur er í boði?

Annars má segja, að Ólafur hefur örugglega skorið suma frambjóðendur úr snörunni, því að nú geta þeir hætt við framboð sitt með skírskotun til þess að Ólafur muni örugglega bera sigur úr býtum og þurfa þar með ekki að upplifa þá smán að fá 0,1% atkvæða.

Annars er ég óhress með það að á myndinni hafirðu sett helvítis hausinn á Össuri á glæsilegan líkama blásaklauss manns, sem ekki má vamm sitt vita.

[Jóhannes Ragnarsson, 18.4.2016 kl. 18:37]

Össur er svo sem ekki alls varnað og gerði sér sjálfsagt glögga grein fyrir að hann hefði ekkert í Ólaf Ragnar að gera í forsetakosningum.

Höfuðið af Össuri á líkama blásaklauss manns er ekki mitt verk heldur einhvers annars.