Jóhannes Ragnarsson

7.1.2017 | 21:42

Er maðurinn svo forhertur að hann ætlast til að þjóðin trúi þessu?

Að sjálfsögðu vísar Bjarni Ben því á bug að hann hafi haldið skýrslunni um afrek Íslendinga á svokölluðum aflandssvæðum, nema hvað? Varla færi maðurinn að viðurkenna svo skuggalegt verk frammi fyrir alþjóð þrátt fyrir að hafa verið með skýrsluna í lúkunum síðan fyrir kosningar. Finnst Bjarna Ben virkilega að hann eigi skilið að komsat upp með svona refjar og útúrsnúninga? Og er Proppi alveg sáttur við að fara í ríkisstjórn með manni sem grunaður er um að fela skýrslu um athafnir auðvaldspésanna á stöðum á borð Panama? - Er Prooppi þessi ef til vill fyrst og fremst að sækjast efir því að verða að almennu athlægi og viðundri hjá þjóð sinni?

Eftir því sem fram kemur, þá hafa einhverjir peningakónar bakað Íslandi og Íslendingum verulegt tjón með háttsemi sinni á aflandssvæðum. Milljarða á milljarða ofan hafa þessir þokkapiltar laumast með úr landi eins og forhertir þjófar að nóttu og svikið þar með þjóð sína og svívirt. Og fregnunum af þessum fjöndum á opinberu skýrsluformi stingur fjármálaráðherrann bara í rassvasann og lætur ekki í þær glitta fyrr en búið er að kjósa og ný ríkisstjórn undir forsæti sama fjármálaráðherra er svo gott sem frágengin. Er ekki eitthvað bogið við svona vinnubrögð, almenningur góður?

Það hafa þeir lengi gert sér grein fyrir, sem viljað hafa vita, að hægrislúbertarnir hér á landi, einkum sjálfstæðisflokksmenn, hafa umgengist samborgara sína eins og þeir ættu allt og mættu allt, og samborgararnir hafa svo sem látið gott heita og kosið samviskusamlega þessi endemi til valda yfir sig. En einhverntíma verður mælirinn fullur. Kapítalisminn og auðvaldsskipulagið eru ekki náttúrulögmál með sjálfvirku réttlæti og ósýnilegri hönd markaðarins. Kapítalisminn er dauðlegt skrímsli, úrkynjað, slóttugt og samfélagseitrandi. Þessháttar ófögnuði eigum við að bægja frá okkur og feta okkur inná brautir mannúðarfulls sósíalisma og fullkominnar mennsku því að það er hægt.