Jóhannes Ragnarsson

9.1.2017 | 20:47

Símon dalaskáld og Guðmundur dúllari tuttugustu og fyrstu aldar

Enginn, hvorki fyrr né síðar, hefir áttað sig á ,,stjórnmálamanninum" Ó. Proppa; sama má segja um pólitísku samtökin sem hann hefir ,,starfað" fyrir, þ.e. Besta flokkinn og Björtu framtíðina. Langflestir sem hafa kosið þessi ósköp hafa ekki gert það vegna þess að þeir hafi verið meðvitaðir um fyrir hvað þetta hefir staðið, enda hafa frambjóðendur þessara lásí- og lúseraframboða ekki haft minnstu hugmynd um það sjálfir. Í gegnum alla þokuna og leikaraskapinn hefur þó ætíð glitt í mjög hærisinnað hugarfar, frálhyggju og mérerandskotanssamaisma. Á hinn bóginn hafa ruglaðir kjósendur litið til Besta flokksins og þeirrar Björtu sem einhverskonar vinstri anarkí uppreisnarafla, sem þeir hafa þó aldrei verið, sérstaklega ekki Bjarta framtíðin sem í besta falli er óheiðarlegur félagsskapur hægrislúberta.

Frú Ingveldur minnist Ó. Proppa sem vankaðs hægrigutta sem erfitt var að botna í. Hann hafi slangrað oftar en einusinni inná heimili hennar og Kolbeins í algjöru tilgangsleysi og verið til leiðinda. Þeim leiðindum hafi ávallt verið bjargað fyrir horn með því fleygja þessum leiðinlega vankasauði út. Brynjar Vondalykt ber, að auðséð hafi verið að Ó. Proppi hafi verið kynlega leiðitamur og auðvelt að láta hann trúa því að hann væri spes og mikilvægur, sem benti til að hægt væri að nota hann til pólitískra blekkinga. Nú hefir sem sé komið í ljós að Ó. Proppa hefir tekist að vafra eins og höfðuðsóttarkálfur um refistigu íslenskra stjórnmála með þeim hlálega árangri að hann er nú við það að leggja rassinn sinn litla við setuna á ráðherrastóli. Geri aðrir betur.

Nú, tvíeykið Benzi og Ó. Proppi er af fróðum mönnum talið það einkennilegasta og kyndugasta síðan Símon dalaskáld hafði Guðmund dúllara sér til halds og trausts og gerði hann að skrifara sínum. Þegar þeir Símon og Guðmundur ösluðu um götur Reykjavíkur á sínum tíma þá fór sú athöfn þannig fram, að skáldið gekk á undan en skrifarinn í humátt á eftir, því að Símoni þótti ekki tilhlýðilegt að þjónninn gengi við hlið meistarns á götu. Á sama hátt og Símon dalaskáld og Gvendur dúllari birtust Reykvíkingum á nítjandu öldinni koma Benzi og Proppi fyrir sjónir landsmanna á þeirri tuttugustu og fyrstu; einlægt stormar Benzi á undan með bringuna sperrta en Proppi fylgir í kjölfarið eins og fyrirburður sem veit ekki hvert hann er að fara. Einn er þó munur á: Símon var þó dalaskáld en Benzi er aðeins braskaraskáld, tónlist Guðmundar var listilegt dúll en hljóðmengun Proppa einungis fáránlegt og ámátlegt garg.