Stríð er ekki eins mannslífs virði.

Þeir eru víst orðnir heldur fáir ofar moldi sem tóku þátt óhugnaðinum sem kallaður er fyrri heimstyjöldinn. Fyrir utan Harry gamla Patch, veit ég ekki um neinn sem enn er á lífi þeirra sem börðust í þessari styrjöld nema Jósef Svejk frá Prag í Tékklandi. Svejk er ekki síður ern er Patch, því enn þann dag í dag má sjá hann á götum Pragborgar,  gamlan og slitinn. Og væri hann spurður að heiti, myndi hann svara yfirlætislaust: - Ég heiti nú Svejk, án þess að hafa hugmynd um mikilvægi sitt í styrjaldarsögu síðustu aldar.

 Það vekur athygli, að í fréttinni um gamla Patch er eftirfarandi setning höfð eftir karlinum: „Of margir létust, stríð er ekki eins mannslífs virði”. Ekki er að efa, að svona óheflaður munnsöfnuður fellur engann veginn að orðræðu og athöfnum bresku ríkisstjórnarinnar, hvað þá hinna amrísku glæpahunda Georgs Bush og hans hyskis. Og ekki er síður ömurlegt að upplifa fylgispekt íslensku ríkisstjórnarinnar við þann djöflafans. 

Heimsótti vígstöðvarnar 90 árum síðar

Frú Ingveldur og hershöfðinginn.

Þegar Ingveldur kom heim frá útlöndum hafði hún með sér gullsnúraðann þriggja stjörnu hershöfðingja. Þetta var þéttur maður á velli, einlægt með harðsvíraðann grimmdarsvip á trýninu, nema þegar fyrir augu hans bar kvenfólk sem vakti girnd hans, en undir þeim kringumstæðum varð hann eins og hver annar auðvirðilegur lostahrókur í framan. -Hann slefar, helvítis hundurinn, sagði faðir Ingveldar við konu sína. - Henni heldég hefði verið nær að halda sig við djöfulinn hann Kolbein þó hann sé veslingur og fáviti. Á meðan hershöfðinnginn dvaldi að Ingveldi, gerði hann það ekki endasleppt og varð þar af leiðandi ekki stétt sinni til skammar. Það kom nefnilega upp úr dúrnum, að hershöfðinginn var, vægast sagt, viti sínu fjær af saurlifnaðarórum. Og það sem verra var: Hann hneigðist ekki einungis til kvenna, heldur að körlum líka. Hann var, eins og það er kallað ,,á báðum áttum." Þennan óviðfeldna eiginleika hershöfðingjans mátti faðir Ingveldar reyna þegar hann lá hálfur undir bílnum sínum og var að gera við. Eftir þá uppákomu gerðust veður válynd kringum hershöfðingjann. Var og viðkomandi sendiráði kunngerð franganga hans og uppátæki, sem leiddi til þess að hershöfðinginn var sendur af landi brott og í herfangelsi, en sendiherrann gekk á fund föður Ingveldar og bað hann innilegrar afsökunar á ónæðinu fyrir hönd þjóðar sinnar. En þegar þar var komið sögu hafði Ingveldur séð sig um hönd og var á nýjan leik háttuð ofan í rúm hjá Kolbeini   

Varaformaður með brennivínssótt á frjálshyggjuvísu.

Það var lágt að venju risið á Ágústi Ólafi Ágústssyni varaformanni Samfylkingarinnar í fréttatíma ríkissjónvarpsins í kvöld. Þarna var þessi kúnstugi stjórnmálamaður enn einu sinni að tala fyrir sínu hjartans máli, ,,verðlækkum á brennivíni." Að þessu sinni kvað sonarsonur Einars ríka uppúr með, að besta forvörnin í áfengismálum væri, auk þess að stórlækka verðið á dramminu og auka aðgengi, að efla forvarnir!!! Er hægt að komast lengra í tvískinnungi og hræsni? Ekki veit ég ástæðuna fyir því hvers vegna fréttastofa sjónvarps valdi þetta reginkjaftæði til fréttaflutnings ásamt viðhafnarviðtali við hinn sérkennilega sósíaldemókratíska varaformann. Slíkt er umhugsunarefni út af fyrir sig. Það er ekki að efa, að málflutningur í anda brennivínshugsjóna Ágústs Ólafs fellur vel í kramið hjá frjálshyggjukleprum á borð við Hannes Hólmstein Gissurarson og hans líka. Hinsvegar er ég ekki jafn viss um að svona skítapólitík hugnist raunverulegum vinstrimönnum í Samfylkingunni vel.  

Koma dekkjastunguþjóðverjarnir ekki til Íslands?

Sannast sagna er algjörlega bráðnauðsynlegt fá þessa róttæku umhverfisverndasinna frá Þýskalandi til starfa hér á landi til að kenna neyslu- og græðgissjúkum jeppa- og lúxusbílaeigendum þá lexíu sem þeir hafa unnið til. Ég er bara hræddur um að hinum róttæku Þjóðverjum komi til með að vaxa verkefnið í augum, því hérlendis er aunginn maður með mönnum nema hann hafi yfir að ráða glæsivagni sem eyðir eldsneyti á við 200 tonna mótorbát.

En það getur orðið nógu andskoti skemmtilegt að sjá manntegundina sem stundum er kölluð ,,tómu jakkafötin" þeytast í loftköstum á 10 - 15 millíjónkróna bensíhák með vindlaus dekk eftir iðju Þýskra umhverfisverndarróttæklinga.

Umhverfissinnar í stríð við eigendur jeppa og lúxusbíla

Dró úr tennur með naglbíti.

Arinbirni stóð ekki á sama um ástleitni frú Ingveldar, þrátt fyrir að ann væri mígandi- dauðadrukkinn. Og þegar hún fór um hann höndum og staldraði við á vissum stöðum varð hann blátt áfram skelkaður, en fékk við fátt ráðið í fyrstu. Svo tókst honum að aungla saman kjarki og sannfæringu til að afþakka blíðulæti Ingveldar. En rétt í þeim svifum, að hann er að komast undan allri þessari ófyrirunnu ást, kemur Kolbeinn þar að og leggur samstundis allt út á versta veg og fremur á þeim Arinbirni og Ingveldi grimmúðlegt ofbeldi. Þegar Arinbjörn komst af gjörgæsludeildinni hringdi hann í Kolbein og vildi friðmælast við hann og leiðrétta meinlegan misskilning. Þetta hefði Arinbjörn betur látið ógert, því Kolbeinn brást ókvæða við, gjörði Arinbirni heimsókn á sjúkrahúsið og dró úr honum allar tönnurnar með naglbíti sem hann hafði meðferðis. Eftir þetta ákvað Arinbjörn að ónáða Kolbein ekki framar eða troða honum um tær.

Fréttastofa RÚV ohf. verkfæri geðvondra hægrimanna?

Ef það er rétt, að fréttastofa RÚV sé farin að stunda stórlygar á hendur Saving Iceland, er einsýnt að það verður að rannsaka málið og þeir sem að lygunum standa sæti ábyrgð gjörða sinna. Það hefur sýnt sig, að því góða fólki, sem berst gegn yfirgangi auðvaldsins í virkjana- og álæðismálum undir merkjum Saving Iceland, hefur tekist að espa borgarastéttina á Íslandi upp í síendurtekin reiðiköst með óvöldu orðbragði sem líkist í ýmsu talsmáta þeirra sem nú hafa verið kærðir í Lúkasarmálinu góða á Akureyri. En að frétta stofa RÚV ohf. skuli láta vanstillta jakkafataklædda borgarstétt hafa sig til að stunda lygar upp á ungt hugsjónafólk sem berst fyrir góðum og nauðsynlegum málstað, er gjörsamlega óþolandi. Mér finnst að Saving Iceland ætti að láta kné fylgja kviði og kæra fréttastofuna ef hún getur ekki fært sönnur fyrir að Saving Iceland þiggi fé fyrir mótmæli og handtökur. 

"Saving Iceland" krefur RÚV um sannanir

Nektarhlaup kvenna í Mosfellsbæ í kvöld.

Að þessu sinni legg ég til, að konur í Mosfellsbæ taki sig taki í kvöld og jafni metin við karlkynið þarí bæ í nektarhlaupi. Ég er ekki í nokkrum vafa um að í heimasveit skáldsins að Gljúfrasteini er að finna í það minnsta þrjár knáar kvinnur af fjallkonuætt, sem ekki víla fyrir sér að kneyfa öl og hlaupa að svo búnu berrassaðar út um víðan völl, jafnréttinu til dýrðar. Ekki sakar þó þær rændu reiðhjólum og fánum á leið sinni, til að gjöra för sína tilkomumeiri.

Áfram stelpur!!!!!

Strípalingar handteknir í Mosfellsbæ

Hrikaleg afglöp Kristjáns L. Möllers - afsagnar verður krafist.

Mikið fjandi er einkennilegt að ríkisstjórnin skuli vera búin að slá jarðgöng milli lands og Eyja af, að því er virðist í eitt skipti fyrir öll. Það er hreint greinilegt að ríkisstjórnarnefnan tekur meira mark á Verkfræðistofu Sigurðar Thoroddsen hf. en almesta sérfræðingi þjóðarinnar í Eyjagöngum, Árna Johnsen. Ég get ekki betur séð en ríkisstjórnin verði að draga þessa fáránlega ákvörðun sína til baka og biðja Árna Johnsen opiberlega fyrirgefningar fyrir að taka minna mark á honum en VST. Erlendis mundi ráherra sem færi svo illa að ráði sínu að taka meira mark á VST hf. en Árna Johnsen verða neyddur þegar í stað til að segja af sér og verða sennilega sóttur til saka fyrir dómstólum í kjölfarið. 

Engin jarðgöng til Vestmannaeyja en ferðum Herjólfs fjölgað

Kapítalisminn í verki.

Svona er nú blessaður kapítalisminn í verki, enda er kapítalisminn fyrst og fremst grundvallaður á lághvötum mannskeppnunnar, eins og til dæmis græðgi, eigingirni og sjálfselsku. Í þessu ljósi er fróðlegt til þess að vita, að á Íslandi er starfræktur trúarsöfnuður, sá næst stærsti á landinu, sem helgaður er kapítalismanum, en þar á ég að sjálfsögðu við Sjálfstæðisflokkinn, sjálft höfuðvígi Mammons á Íslandi. Þessi merkilegi trúflokku hefur bundið svo um hnútanna að nú um stundir siglir allt hraðbyri hjá okkur í átt til æ meiri samþjöppunar peninga og valds á kostnað lýðræðis og valddreifingar.

Það var því vel viðeigandi að ríkisrekna frjálshyggjuskáldið Hannes H. Gissurarson stæði fyrir kapítalískri vakningarguðþjónustu í Þjóðminjasafninu í gær þar sem Geir Haardi, ásamt erlendum mammonsþjónum, vitnuðu í belg og biðu um skattalækkanir. En allir vita á hvaða nótum skattalækkanir þessa hvimleiða söfnuðar eru, þ.e. allar í þágu atvinnurekendavaldsins og annarra arðræningja.

 

Hótuðu gjaldþroti

Refsing fyrir hórdómsiðkun.

Að afloknu sumri gjörðust nætur langar og dimmar með djúpu regni og skýjafari. Það var eina slíka, að Drottinn Guð Alsherjar vitraðist Kolbeini í draumi og lagði honum blátt bann við að spenna frúna í næsta húsi. Þegar Kolbeinn vaknaði var hann strax staðráðinn að virða orð Skapara síns að vettugi því hann girntist ákaflega umrædda frú og notaði hvurt tækifæri til að drýgja með henni hór. Síðdegis þann sama dag áttu þau stefnumót í bárujárnsklæddri skemmu, hvar í var geymd skreið. Þrátt fyrir ókræsilega aðstöðu þar innan um þurrkaða þorskfiska, töldu þau sig sæmilega óhult þar við skemmtiiðkan sína. En þetta örlagaríka síðdegi fékk Kolbeinn að reyna hvað það kostar að óhlýðnast Hymmnaföður dýrlegum, því án viðvörunar bast þekjan og yfirsteyptist þau. Og á meðan þau lágu þar öskrandi og veinandi og öngviti nær, stórslösuð og ósjálfbjarga, sat Drottinn Guð Almáttugur á skrifstofu sinni á Hymmnum Hátt og glotti með sjáfum sér.