Hamfarir af mannavöldum eða allt í góðu lagi?

Ef fjöldi starfa á Vestfjörðum væru jafnmörg og nú, en fjöldi íbúa sá sami og fyrir tuttugu og fimm árum, hvað væru þá margir atvinnulausir?

Nær væri að birta fréttir af hve störfum á Vestfjörðum hefur fækkað síðustu áratugina en að demba yfir fólk að ekkert atvinnuleysi sé á þessu landssvæði eins og allt sé þar með felldu og í góðu lagi.

Ekkert atvinnuleysi á Vestfjörðum

Munurinn á heilögum sjómanni og trúlausum pokapresti

Mikið hefur nú séra Adelir heitinn verið lítill kennimaður og andlaus, og trúmaður hefur hann enginn verið. Hefði séra Adelir verið andheitur og sanntrúaður maður hefði hann ekki fokið útí buskann, hangandi neðaní blörðum sínum, og fundist loks andaður á hafi úti. Bænheitur eldklerkur hefði aldrei fokið af leið í helíumblöðruflugi, því síður drukknað í sjó, eða öðru vatni.

Hér fyrr á árum var ég til sjós með manni, sem var svo heilagur, að honum var í lófa lagið að bregða sér útfyrir borðstokkinn, hvenær sem honum þóknaðist, og ganga á sjónum. Þessi hæfileiki mannsins kom oft að góðum notum þegar veiðarfæri komu óklár úr sjó eða afli var mikill. Þó var sá einn ljóður á ráði þessa góða manns, en það var þegar hann tók sig til á hafi úti og labbaði yfirí aðra báta til að kjafta við kallana þar og drekka með þeim kaffi. Ekki var skárra þegar maður þessi var timbraður eftir einhverja jörvagleðina á verðbúðinni, þá stökk hann gjarnan frá borð og gekk, eða hljóp, beina leið í land til að sofa úr sér timburmennina eða fá sér mildan og upplyftandi afrétting. Mikið ósköp öfunduðum við strákarnir þennan félaga okkar þegar hann tók landstímið á tveimur jafnfljótum, því við vorum líka timbraðir en komumst því miður ekki frá borði og urðum að gera okkur að góðu að puða við að drepa fiska klukkutímum saman þó heilsan væri bág og veðrið vont. 

Fljúgandi prestur finnst látinn

Ólafur F. skýtur þúfutittlinga með fallbyssu

Það má með sanni segja, að hans hátign, Borgarstjórinn í Reykjavík, skjóti af fallstykkjum á þúfutittlingana í Samfylkingunni og Framsókn. Segir mér svo hugur um, að nú liggi þessi lítilfjörlegi fiðurfénaður illa laskaður, eftir að hafa þegið kúlnaregn borgarstjóra undir stélfjaðrir sínar. Það er semsé endanlega komið uppúr dúrnum, að Samfylking og Framsóknarflokkur hafa einarðlega á stefnuskrá sinni að farga Íslandi, leggja það í rúst svo ekki standi steinn yfir steini. Eins og staðan er í dag, er vandséð að nefndir niðurrifsflokkar eigi nokkurntíman afturkvæmt í meirihlutasamstarf í borgarstjórn Reykjavíkur, um það ætla Ólafur F., frjálshyggjukompaní Sjálfstæðisflokksins og Svandís Svavarsdóttir að sjá.

„Skýrir hvers vegna síðasti meirihluti sprakk"

Listaháskóla Íslands til Ólafsvíkur

Þar sem skjalfest er í bak og fyrir, að starfsemi ríkisins skuli dreift eins og hægt er um byggðir landsins, tel ég einsýnt að Listaháskóla Íslands verði komið fyrir í Ólafsvík. Fyrir utan að verða sæmilegur búhnykkur fyrir okkur Ólsara, myndi slík ákvörðun leysa vitringana í borgarstjórn Reykjavíkur undan meira rifrildi en orðið er útaf staðsetningu þessa vandræðaskóla. Ég er sérlega brandsjúr á, að Listaháskóli við Laugarveg á eftir að leggja núverandi meirihluta í Reykjavík í gröfina ef hann verður ekki tekinn af þeim og það strax. Ekki það að einhver eftirsjá sé af nefndum meirihluta, en það er bara engum manni bjóðandi að horfa uppá borgarstjórnarliðið haga sér alla daga eins og illa skeindir unglingar með króníska njálgssótt.

En nú er semsé komið að því, að þingmenn Norðvesturkjördæmis taki sig saman í andlitinu og færi okkur Ólsurum Listaháskóla Íslands áður en Reykjavík brennur til kaldra kola vegna þessa sérkennlega menntamáls.      

Sjónarhorn beggja verði virt

Glæsileg messulæti og trúarhiti

Það eru naumast messulætin þarna í Knoxvill og trúarhitinn. Ég er hundraðprósent viss um að karlmaðurinn um fertugt var búinn að undirbúa sig vel áður en hann fór til guðsþjónustunnar. Að hann hleypti af 13 skotum var engin tilviljun; hann skaut einu skoti fyrir hvern lærisvein og auk þess einu fyrir Frelsarann, samtals 13. Og hverjum þeirra þrettámenningana ætli maðurinn hafi verið að skjóta til heiðurs þegar hann hæfði þann er beið bana? Það væri fróðlegt að vita. Nú er bara að bíða og sjá hvort svona Knoxvillhelgihald verði tekið upp á Íslandi og hvort kirkjugestum muni ekki fjölga svo um muni við þessháttar fyrirkomulag.

Skaut á kirkjugesti

Erótískt ölvunarástand í gluggaboru

Óttalegur apaköttur hefur manngarmurinn verið að leggja á sig að klifra upp húsvegg til þess eins að skríða inn hjá kunningja sínum. Hefði það verið kvenmaður sem maðurinn ætlaði að heimsækja hefði málið litið öðruvísi við. Það hefur löngum verið siður knárra kappa í erótísku ölvunarástandi að smokra sér innum glugga hjá heitu kvenfólki og kóróna þar með konunglega næturskemmtun. Raunar hafa ófáir slíkir valið sér helst til þröngar gluggaborur og setið þar fastir á belgnum, jafnvel klukkustundum saman. En þegar karlmaður reynir að skríða innum glugga til annars karlmanns um hánótt, þá er það ósómi af versta tagi. Í Sódómu og Gómorru hafði karlpeningurinn tekið upp þennan sið og allir vita hvernig það fór. Ekki trúi ég því að Reykjavík vilji espa Guð svo upp, að hann afgreiði hana á sama hátt og ofangreindar borgir.

Prílaði upp svalir

Herbertsstrassebragur á Akureyri

Fréttin af Íslendingnum Freyju er hreint skelfileg. Ef sómakær og dannaður Íslendingur sæi svona ,,skapandi sumarstarf" erlendis dytti honum samstundis eitt og annað miður göfugt í hug. Það er nefnilega ekki öllum gefið að þramma eins og ekkert sé framhjá slíku daðursástandi; hugur jafnvel siferðilega stöndugra manna myndi fyllast af freistingum og synd, sem óvíst er að þeir gætu staðist. Og það skulu Akureyringar vita, að það er óguðlegur skepnuskapur að freista Andskotans með þessum hætti. Svona uppátæki verður að stöðva strax því á skal að ósi stemma, nema Akureyringum sé í mun að gera bæinn sinn að einhverkonar Herbertsstrasse.  

Freyja sólar sig

Seðlabankastjóri og frjálshyggjugríslingarnir valda reginhneyksli

Jæja, það er þá svona komið. Þetta grunaði mg alltaf. Þegar Drottinn Alsherjar í Seðlabankanum, sjálfur Seðlabankastjóri, er farinn að taka þátt í fávísum samkvæmisleikjum útbrunninna frjálshyggjugríslinga er ekki nema von að ástandið sé eins og það er. Þvílíkt fokastanlegt framferði af hálfu Seðlabankastjóra er náttúrlega ekkert annað en eitt reginhneyksli og á að meðhöndla sem slíkt. Úr því sem komið er, verður Gjeir Haaarde að leika, nauðbeygður að sjálfsögðu, eina leiknum sem fær er í stöðunni, sem sé, að víkja Selabankastjóra tafarlaust úr starfi áður en landið sekkur endanlega.

Davíð boðaði Sigurð Kára á leynifund

Andstyggilegt lögregluríki í uppsiglingu

Það er þokkalegt ef fólk hefur ekki lengur frið til að skemmta sér fyrir lögregluandskotanum. Og heldur er skörin farin að færast uppí bekkinn þegar sjálfri Víkingasveitinni er sigað á friðelskandi fólk sem ekkert hefur til sakar unnið annað en að gera sér glaðan dag, lyfta rauðvínsglasi í góðra vina hópi. Það er aumt að búa í slíku lögregluríki.

Átta handteknir í Keflavík

Samfylkingarbeibíin hvetja til spellvirkja í Kópavogi

Til hvers ætti Gunnar I. borgarstjóri Kópavogs að vera auglýsa stöður sem hann er hvort eð er búinn að ráða í? Það er bæði illa gert og heimskulegt að láta blásaklaust fólk hafa fyrir að sækja um störf sem þegar eru frátekin. Þetta veit Gunnar borgarstjóri og þessvegna dettur honum ekki í hug að auglýsa því hann er hvorki fáráðlingur né illmenni. Hinsvegar má með sanni segja að samfylkingarbeibíin séu að hvetja til spellvirkja með því ætlast til að störf sem borgarstjórinn er búinn að úthluta séu auglýst. Sennilega færi best á, að áminnst samfylkingarbeibí legðu sjálf sig niður sem slík og sneru sér að golfíþróttinni eða pöbbarölti í staðinn þar sem kraftar þeirra kæmu sannarlega að einhverju gagni. 

Gagnrýna mannaráðningar