Jóhannes Ragnarsson

2.8.2017 | 15:36

Svo verður Árna, Páli og Bjössa róið út til Eyja

Jæja, þá er allt til reiðu að róa Árna Johnsen, Páli Magnússyni og Bjössa í Klöpp út í Vestmannaeyjar á þjóðhátíð. Mikil vatnaskil urðu í máli þremenninganna þegar einhver Jón Gunnarsson, sem sagður er samgönguráðherra, ógilti úrskurð Samgöngustofu, sem hafði látið það eftir sér að ganga í berhögg við jarlana úr Eyjum og bannað ferjutítlu á vegum Eimskipa að róa með kappana frá Landeyjafjöru út til Heimaeyjar. Þegar úrskurður þessa Jóns lá fyrir hófst Elliði bæjarstjóri í Eyjum þegar í stað handa, í eigin persónu, að við að slá saman hliðgrind, sem staðsett verður á bryggjunni og skrýdd blómum, sem kapparnir þrír eiga að ganga í gegnum við geypileg fagnaðarlæti heimamanna, þegar þeir ganga á land.

Annars er flestum Íslendingum farið að leiðast frekja og svarragangur Eyjamanna með þorpsundrið sitt fremstan meðal jafningja í kjaftbrúki og fórnarlambsvæli. Sumir eru á því, að réttast sé að gefa Vestmannaeyjum sjálfstæði frá Íslandi og gefa þeim einnar sjómílu fiskveiðilögsögu umhverfis eyjarnar. Þegar Vestmannaeyjar verða sjálfstæð þjóð mega þeir láta öllum illum látum heima hjá sér og bora jarðgöng frá sér til Færeyja og Shetlands án þess að okkur komi það við. Hinsvegar er ekkert víst að Færeyingar eða Shetlendingar kæri sig nokkurn skapaðan hlut um vegakerfi til sín frá þessara kyndugu Johnseneyja í norðri og myndu umsvifalaust setja tappa í gangnaopið ef Eyjamenn myndu allt í einu birtast upp úr jörðinni hjá þeim.

En nú er semsagt allt tilbúið fyrir þjóðhátíð Sjálfstæðisflokks Eyjamanna með tilheyrandi drykkjulátum, eiturlyfjajukki, líkamsárásum, nauðgunum og öðrum ámóta skrílslátum. Þetta er nefnilega Þjóðhátíð með risastóru þorni (Þ), sannkölluð lyftistöng fyrir Eyjaauðvaldið. Og sýslumennið Pálína mun tryggja að aungvar neikvæðar fréttir berist af Þjóðhátíðinni atarna, aðeins jákvæðar, því að sona hátíarhöld verðskulda sagnfræði sem stýrt er að ofan.