Barátta Gottfreðs læknis við hættulega smitsjúkdóma

Það var alltaf líf og fjör í skólanum þegar gottfreð læknir kom þangað í heimsókn til að sprauta krakkana við hræðilegum sjúkdómum. Hið versta var hve börnin voru voðalega hrædd við Gottfreð og forðuðust að leyfa honum að komast nálægt sér. Og út af því hve illa tókst til að ná börnunum til að láta sprautast tók Gottfreð til bragðs að hafa með sér þrjá fanta, fólsk illmenni sem höfðu unun af að elta börnin, grípa þau og draga til Gottfreðs, sem hóf sprautuna hátt á loft og stakk nálinni á svartakaf í berandann á þeim. Af þessu hlaust mikill harmagrátur, agg og óhljóð.

- Viljiði kanski drepast úr mislingum, svartadauða eða ebólu fyrir fermingu, andskotans kettlingarnir ukkar, æpti Gottfreð læknir og sté stríðsdans af umhyggju fyrir heilsufari barnanna. Svo sagði hann þeim ægilegar sögur af dauðastríði fallegra og góðra barna sem höfðu ekki verið bólusett. - Einn stelpan, skal ég segja ukkur, sagði Gottfreð, veiktist svo hrottalega af mislingum og svartadauðabróður að hausinn spýttist af henni eins og korktappi úr flösku og hefði skotist út um gluggann ef önnur fléttan á hausnum hafði ekki flækst í krók sem var á gluggapóstinum. Og öll börnin hágrétu og orguðu af hræðslu og hryllingi og sáu fyrir sér hvernig hausinn á góðu telpunni þeyttist af hálsinum eins og tappi úr flösku.

Síðar hældi Gottfreð læknir sér af því að henn hefði aldrei misst krakka úr mislingum eða þessháttar alla sína læknistíð. Hinsvegar komu á seinni tímum fram á sjónarsviðið einhver hópsamnorrænumenntuð félagsfífl með háskólagráður sem gerðu hróp að Gottfreð lækni og læknisaðferðum hans á skólabörnum. Þetta skaðmenntaða samnorrænupakk bar honum á brýn, barnafasisma, kvalalosta, illmennsku og hreina og beina drápsfýsn. Sumt af þessum mótmælaliði heimtaði að Gottfreð væri sviptur læknisréttindum og dæmdur í lífstíðarfangelsi; þeir reiðustu heimtuðu að fá að grýta hann í hel eins og fornmennirnir okkar í Eyrbyggju gerðu við Kötlu galdrakvinnu. Enn er barátta Gottfreðs við samnorrænu teprutíturnar ekki útkjáð og vandséð er hvor aðilinn mun standa upp sem sigurvegari.  

Þátttaka í bólusetningum óviðunandi