Hlýviðrið undanfarið hefir ruglað veslings manngreyið í ríminu

Þessi náungi hefir áreiðanlega ruglast í ríminu út af hlýviðrinu undanfarnar vikur. Það alþekkt að afbrigðilegt veðurfar getur haft alvarlegar afleiðingar á veiklað fólk þammig að það grípur til óyndisúrræða, sem verka einkennileg í hugum annarra. Maðurinn með ljáinn hefir auðvitað haldið, að eftir öll hlýindin að undanförnu væri komið að slætti; honum hefir þókt sprettan góð og dregið fram ljáinn til að blessaðar sauðkindurnar hefðu eitthvað gott til að japla á þegar færi að vetra.

En eins og við mátti búast misskildi lögreglan, ekki síst Hálfdán varðstjóri, manninn alveg hryllilega, tók af honum amboðið og lokaði hann sjálfann inni, um há-bjargræðistímann. Þetta gerðu yfirvöldin líka við Jón Hreggviðsson; tóku hann frá slætti og búsýslu til að hýða hann og dæma til dauða fyrir snærisþjófnað og grun um að hann hefði kálað böðli kóngsins. En það fór nú sem það fór og amen á það.

Svo má vera, það hefir ekki verið rannsakað enn, að maðurinn með ljáinn, sem lögreglan handtók, sé í raun og veru Maðurinn með Ljáinn, sem talað er um að fari milli fólks og fargi því. Ef svo er mega Hálfdán varðstjóri og menn hans aldeilis fara að vara sig: Maðurinn með Ljáinn gæti hæglega skundað út í gegnum harðlæsta hurð fangaklefans og brugið ljánum á hálsæðarnar á þeim, svo undursnöggt, að þeir fengju aungva rönd við reist. Þó trúi ég að Hálfdán Varðstjóri sleppi eins og venjulega, því hann er í tygjum við ekki minni höfuðpersónu en sjálfann Sathan myrkrahöfðingja, sem mun bjarga Hálfdáni ef Maðurinn reiðir Ljáinn upp gegn honum.

Mundaði ljá á almannafæri