Ríxlögreglustjóri sigri hrósandi eftir að hafa veitt dómsmálaráðherra duglega ráðningu

Það veit ótvírætt á gott að ríxlögreglustjór skuli hafa komið fullkomlega hamingjusamur og skælbrosandi, að ekki sé sagt skellihlægandi, út af fundi með litla dómsmálaráðherranum. Trúlega liggur dómsmálaráðherra þessa stundina í hnipri undir ráherraskrifborðinu sínu í einu skelfilegu áfallastreytukasti, ný-flengd og í heiptarlegum íhaldsfráhvörfum. En ljóst má þykja, að ferðalaga ríxlögreglustjóra á fund ráðherra hefir verið mikil sigurför fyrir hann og er nú meir en líklegt að dómsmálaráðherra sé á leið í langt veikindaleyfi eða segi bara hreinlega af sér; og fer þá að verða greið leið fyrir einhvern málsmetandi mann í stól dómsmálaráðherra.

Nú má fastlega gera ráð fyrir, að ríxlögreglustjóri láti kné fylgja kviði og dauðhreinsi vígstöðvar íslensku lögreglunnar af illa þenkjandi hælbítum og vemmilegu púkastóði, sem að undanförnu hefir haft sér til gamans að hrekkja og trylla ríxlögreglustjóra og efsta lag Sjálfstæðisflokksins. Sennilega verður Hálfdáni Varðstjóra falið að leggja höndur á skrílmenni, sem hafa smyglað sér eins og minkar inn í raðir lögreglunnar. Á þessari stundu er tímabært fyrir grunuð skrílmenni að fara að fara með bænirnar sínar, því óvíst er með öllu að þeir borði kveldmatinn heima hjá sér í dag eða vakni í rúmum sínum í fyrramálið við hlið maka síns.

En auðvitað höfum vér öll áhyggjur af dómsmálaráðherra á þessar ógnvekjandi stundu. Mun blessuð telpan ná fótavist og krafla sig undan borðinu, eða verða það örlög hennar að skúringakonan sópi henni upp á fægiskúffuna og kasti í eldsofninn. Og nú vóru oss að berast af því fregnir, að ríxlögreglustjóri hafi barið svo hrottalega í skrifborð dómsmálaráðherra, beint fyrir framan nasirnar á ráðherranum, að borðið hafi hrokkið í tvennt eins og eldspýta, og þar með bundið bráðan endi á kjaftagang um starfslokasamning og annað í þeim dúr; ennfremur að ríxlögreglustjóri hafi með öskrum og formælingum neytt dómsmálaráðherra til að eta plaggið sem stafslokasamningurinn hafði verið ritaður á - dómsmálaráðherra gerr líklega ekki annað á meðan hún meltir þann ólukkans samning, sem breyttist úr stafslokasamningi í tormelta fæðu fyrir litla dömu, sem aldrei hefir bragðað annað en humarhala og hvítvínsgutl.   

Ræddu opinskátt um stöðu lögreglunnar