Djöfullegt innræti og tvíelleft skemmdarvargafýsn

Það þarf meira en djöfullegt innræti og tvíellftan skammt af skemmdarvargafýsn að leggjast svo lágt að ráðast að hýbýlum guðsengla eins og Wernersbræðra og útata allt og fordjarfa með rauðri málningu, máske skipalakki eða botnfarva. Guðsenglar á borð við bræðurnar Wernersson eiga annað og betra skilið af almúgahyskinu, sem þeir af einstakri fórnfýsi hafa reynt hvað þeir geta að gera bjargálna.

Svona skemmdarvarga, sem vaða um borg og bý og eyðileggja eignir góðra manna, að verður að uppræta og í eldsofninn kasta, svo notað sé hákristilegt orðalag úr sjálfri Biflíunni. Ég man eftir drenghelvíti einu, þrettán ára gömlu, sem tók uppá þeim ljóta sið að dæla tjöru úr einhverskonar vatnsbyssu, sem faðir hans hafði keypt í útlöndum og gefið honum, innum glugga hjá saklausu fólki, einkum innum svefnherbergisglugga að næturþeli. Þessi drengur var upprættur. Og það var til þess tekið að hvað sóknarprestinum var ljúft að jarðsyngja þennan pilt - enda var talið að sóknarpresturinn sjálfur hafi átt hvað drýgstan þátt í að uppræta óbermið.

Ég legg að minnsta kosti til, svo að ég leggi nú eitthvað til, að Stjörnusýslumanninum Stones á Selfossi og hans vösku varðsveit verði falið að leggja til atlögu við hina málningarglöðu skemmdarvarga og ganga milli bols og höfuðs á þeim áður en þeir hætta að láta sér nægja að útsvína veggi góðra manna og fara að mála Wernersbræður sjálfa uppúr hárauðu vélarlakki. 

Hús Wernerssona máluð

Athugasemdir

[Jón Snæbjörnsson, 16.9.2009 kl. 10:03]

Tryggingarfélög ættu kanski að skoða verðskránna hjá sér og búa til nýjan hóp manna sem telja sig vera í sérstökum "áhættuhóp" og greiða því sérstök gjöld sem fyrir "tjón" sem þetta - þá þarf ég allavegana ekki að blæða meira fyrir þessa viðskiptaspútnikasérfræðinga

[Adda Guðrún Sigurjónsdóttir, 16.9.2009 kl. 10:07]

Annaðhvort ertu að djóka eða þú ert kolruglaður Jóhannes.

Ég myndi sjálf kaupa málningu til að skvetta á hús þessara óberma eins og þú orðar svo snyrtilega...kannski ég láti verða af því!

[Örn Úlriksson (IP-tala skráð) 16.9.2009 kl. 10:13]

Svona grjót%%%%%%i.  Þessir menn eru eru ekki af guði.  Nema þú.  Þú myndir ekki skylja það.  þannig að ég bendi þér á www.krossinn.is

[Skorrdal (IP-tala skráð) 16.9.2009 kl. 11:42]

Að skemma málningu, eða skemma samfélag, er tvennt ólíkt. Þú stendur greinilega með þeim er rústa samfélaginu, Jóhannes. Gott að vita...

[Níels A. Ársælsson., 16.9.2009 kl. 23:28]

Kemur nú einn prelátinn hoppandi á öðrum fæti úr skilnaðarkirkjuni Krossinum gaggandi eins og miðaldra siðvönd prestmaddama !