Friðarferli með báli og brandi

Sko bara, Kondólessa Ræs hefur áhyggjur af ,,öryggi óbreyttra borgara" á Gasa-svæðinu eftir að hafa látið Olmert ísraelsforseta lofa sér því að herða sig í að berja á mannfólkinu með báli og brandi á þessu sama Gasa-svæði. Þó er huggun harmi gegn, að frú Ræs er alveg í þann veginn að skella sér til Miðausturlanda til að ýta á eftir ,,friðarferlinu" í Ísrael og Palestinu. Ekki ónýt ýting það!

Já, þeir geta verið gamansamir brennuvargarnir í Wasington þegar vel liggur á þeim. 

Ísraelar gera loftárásir á Gasa

Náttúrspjöll

Ætli það sé meiningin að fólk eigi að trúa þessum loðnumælingarsjónhverfingum? Svona stærðfræðikúnstir minna mann á meistara Sölva Helgason þegar hann sínu alkunna lítillæti reiknaði hvít barn í svarta konu suðrí Afríku! En hvað um það, eigendur loðnuskipanna höfðu sitt fram, eins og fyrri daginn. Eftir stendur geðlaus og glataður sjávarútvegsráðherra sem ætti að segja tafarlaust af sér.

Áframhaldandi loðnuveiðar er ekki hægt að flokka undir annað en náttúrspjöll; hættuleg inngrip í lífkeðjuna, sem getur haft mjög alvarlegar afleiðingar í för með sér til lengri tíma. Á þessum punkti á náttúran að njóta þess vafa sem uppi er um stofnstærð loðnunnar, allt annað er ókræsilegur sambreyskingur af skammtímahagsmunum, græðgi og heimsku.   

Einar: „Mjög ánægjulegt“

Jénífera gyrðir ærlega uppum sig

Ósköp er nú mikið í það varið hjá henni Jéníferu að vera búin að leggja allt kynferðislíf á hilluna því þetta tiltekna ,,líf" er náttúrlega eins og hver annar subbuskapur og öllum til hnjóðs sem það stunda. Það er því mikið gleðiefni, að vitsmunavera eins og Jénífera, skuli hafa séð ljósið í myrkri frumskógarflækju eðlunarfýsnarinnar, og í framhaldi af því gyrt ærlega uppum sig í eitt skipti fyrir öll. Afturámóti fipast henni illilega þegar hún fellur í það forað að tala um ,,sanna ást." Sönn ást er að sjálfsögðu ekki til, aðeins girnd eða gredda, eða hvað menn og konur vilja kalla það.

Svo er bara að vona að fleiri konur taki Jéníferu sér til fyrirmyndar með því að gyrða sig myndarlega í brók. Geri þær það ekki, eiga þær á hættu að fá á sig nafnbótina ,,brókarsóttargemlingur." 

Ekkert kynlíf í hálft ár

Að raska fölskvalausri íhaldsró

Ætli íhaldið á Álftanesi hafi ekki, eftir 20 ára slímusetu í meirihluta, verið búið að sanka að sér eintómum sauðtryggum sjálfstæðisflokks-jáurum inn á bæjarskrifstofuna? Ég býst við því. Það eru alkunn vinnubrögð þessa einræðissinnaða stjórnmálaflokks.

Ég geri ráð fyrir að félagi Sigurður Magnússon bæjarstjóri hafi náð að raska hinni fölskvalausu íhaldsró á bæjarskrifstofunni og flokksráðnu starfsmennirnir hrokkið upp af værum blundi eftir 20 ára íhaldssvefn. Og það er heldur enginn glæpur, nema í augum sjálfstæðismanna, að vekja fólk upp af íhaldsdái; slíkur gjörningur flokkast fyrst og fremst undir góðverk sem ber að þakka. En sem betur fer er til fleira hæft fólk til skrifstofustarfa en staurblindur íhaldslýður. 

Það er svo kapítuli út af fyrir sig að blaðamenn 24 stunda skuli ekki hafa náð á félaga Sigurð Magnússon áður en ,,fréttin" fór í vinnslu. Ætli þeir hafi hringt í skakkt númer?  

Bæjarskrifstofan: Starfsfólk á flótta

Morgunbæn

Okrarans höfuð, hrokkið og grátt,

hvimaði´ um syllur og snaga.

Melrakka-augað var flóttaflátt,

flærðin rist í hvern andlitsdrátt

og glottið ein glæpasaga. –

Hann hafði ævinnar löngu leið

leikið sér frjáls að tárum og neyð

og óheftur ginið við gróðans veið,

geymdur helvítis aga.

(Einar Benediktsson) 

Og ég leit til: og sjá: Þér höfðuð syndgað móti Drottni, Guði yðar, þér höfðuð gjört yður steyptan kálf (hér er átt við gullkálf þann er lýðurinn dansaði kringum) og höfðuð þannig skjótt vikið af þeim vegi, sem Drottinn hafði boðið yður (5. Mós. 9.16) En synd yðar, kálfinn, sem þér höfðuð gjört, tók ég og brenndi í eldi og muldi hann vandlega í smátt, uns hann varð að fínu dufti, og duftinu kastaði ég í lækinn, sem rann þar ofan af fjallinu. (5. mós. 9.21) 

Þeir komu til Jerúsalem, og hann gekk í helgidóminn og tók að reka út þá, sem voru að selja þar og kaupa, og hratt um borðum víxlaranna og stólum dúfnasalanna. Og engum leyfði hann að bera neitt um helgidóminn. Og hann kenndi þeim og sagði: ,,Er ekki ritað: ,Hús mitt á að vera bænahús fyrir allar þjóðir?´ En þér hafið gjört það að ræningjabæli.Æðstu prestarnir og fræðimennirnir heyrðu þetta og leituðu fyrir sér, hvernig þeir gætu ráðið hann af dögum. Þeim stóð ótti af honum, því allur lýðurinn hreyfst mjög af kenningu hans. (Mark. 11. 15-19) 

Undirrót allra lasta
ágirndin kölluð er.
Frómleika frá sér kasta
fjárplógsmenn ágjarnir
sem freklega elska féð.
Auði með okri safna,
andlegri blessun hafna
en setja sál í veð.

(16. passísálmur)

Obama og Clinton harðorð

Stórstíg og höfðingjadjörf

Þau gjörast nú skemmtilega stórstíg og höfðingjadjörf þessa dagana þau Ingibjörg Sólrún og Gjeir Haaarde; hún fundaði með Bankamún yfirkontórista Sameinuðu þjóðanna en Haaarde með Jopp Hopp framkvæmdastýru NATÓ.

Og ekki var víst töluð vitleysan á þessum velheppnuðu fundum og árangurinn eftir því enda ekki við öðru að búast. Frú I. Sólrún fékk t.d. Bankamún til að lofa því að fjölga konum í leiðandi stöðum innan SÞ, en Haarde fékk gott klapp á bakið frá Jopp Hopp fyrir vasklega friðarframgöngu íslendinga í Afganistan og mátti skilja á orðum Jopps að íslensku friðardátarnir, austur þar, væru alveg til friðs á ópíumökrum Afganistan.

Það er alltaf jafn framúrskarandi dásamlegt þegar íslenskir ráðamenn ganga fyrir kónga og keisara hndan atlandsála og hljóta að launum klapp á kollinn.

Ræddi við Ban Ki-moon

Eiður Smári í Víking Ólafsvík í vor

Ég held hann Eiður okkar Smári ætti að hætta hjá þessum þorpurum í Barcélónu og spila þess í stað með Víkingi Ólafsvík í sumar. Ég er næsta viss um að hann kæmist mun oftar í byrjunarliðið hjá Ólsurum en Barcélónurum.

Eiður Smári ekki valinn í hópinn

Þjófafélag eða þjóðfélag ?

Ójá, þau eru mörg ránin sem framin eru í heiminum. Það vantar nú ekki. Eða segir ekki einhversstaðar á góðri bók, að við búum í þjófafélagi en ekki þjóðfélagi?

Hvaða munur er t.d. á að ræna banka með því að grafa 80 metra göng til að komast að því allra helgasta, sjálfri peningeymslunni, og hafa á brott með sér álitlega peningaupphæð, eða að gera sér lítið fyrir og sölsa undir sig heilli náttúruauðlind eftir pólitískum spillingarleiðum? Eða hafa með sér olíusamráð? Eða selja sameignir landsmanna á spottprís? Og þannig mætti eflaust lengi telja. En svona háttalag er nú einusinni kapítalisminn í framkvæmd og svo sem ekkert um það að segja ...

Munið svo, elskulegu lesendur, að kaupa bókina sem út kom í gær sem hann Hanniz okkar hérna Holmstone ritstýði. Það held ég sé upplífgandi lesmál, ekki síst fyrir öryrkja og gamalmenni.

 

Leiðtogi þjófagengis handtekinn

Æsingur íslenskra fíkla ...

Viðbrögð japönsku nemendanna gagnvart hinni 39 á gömlu karlkyns skólastúlku, minnir um margt á æsing íslenskra kvótafíkla þegar þeir heyra minnst á breytingar á kvótakerfinu þeirra.

Skólastúlkan var 39 ára karl

Frjálshyggjudrengirnir Ágúst Óláfur og Mángi Stef

Það var fróðlegt að fylgjast með stuttbuxnadeild Sjálfstæðisflokksins við upphaf þingfundar Alþingis í dag. Þar fóru fremstir flokki frjálhyggjubörnin Birgir Ármannsson og Sigurður Kári Kristjánsson, en þeirra erindi í ræðustól var að vekja athygli á nýútkominni frjálhyggjuskræðu, sem mér skilst að sé ,,ritstýrt" af spjátrungnum og vandræðagemlingnum Hannesi Hólmsteini Gissurarsyni, sem eins og allir vita er ríkisrekinn frjálshyggjuspámaður. Ekki gátu stuttbuxnapésarnir Birgir og Siguður Kári gengið hreint til verks og auglýst herverki ríkisrekna frjálhyggjumannsins beint og milliliðalaust, heldur notuðu þeir ályktun flokksráðsfundar VG frá síðustu helgi til að vekja athygli á framtaki meistara þeirra.

Þó verður að segjast eins og er, að þó að stuttbuxaðir vikapiltar ríkisrekna frjálhyggjuspámannsins hafi staðið sig með prýði í koma umræddu helgiriti peningageðsýkinnar á framfæri, þá stóðu stuttbuxnadrengirnir Ágúst Óláfur frá Samfylkingunni og Magnús Stefánsson framsóknarmaður sig enn betur í stykkinu með heiðskýrum stuðningi sínum við auðvalds- og braskshugmyndafræði hinna ríku og voldugu.

Ég er satt að segja stórundrandi á að stuttbuxnafyrirbærin Ágúst Óláfur og Mángi Stef skuli ekki hafa þann frómleik, hugrekki og manndóm sem uppá vantar að stíga skrefið til fulls og ganga formlega til liðs við hugsjónabræður sína í frjálshyggjudeild Sjálfstæðisflokksins. Ég er viss um að þessum flokksvilltu páfuglum myndi líða fjarskalega vel við fótskör ríkisrekna frjálshyggjumeistarns Hannesar Hólmsteins Gissurarsonar.

Ályktanir flokksráðsfundar Vinstri grænna í febrúar 2008 há lesa í heild sinni á heimasíðu flokksnis, vg.is http://www.vg.is/frettir/eldri-frettir/nr/3173 

Tekist á um skattamál á Alþingi