Hin kýrskýra blók hefur baulað út

Það er rétt á mörkunum að það sé verjandi að eyða prentsvertu og tíma á ómerkingsdindil eins og Árna Þór Sigurðsson. Það er eins og hvert annað ólán að þessi auma blók skuli af einhverjum ástæðum hafa álpast útí stjórnmál og enn verra ólán að skepnan skuli hafa lent undir verndarvæng Svavarsfjölskyldunnar og í framhaldi af því gerst önnur helsta búrtík hins siðlausa formanns úr Þistilfirði ásamt Birni nokkrum Vali, sem situr á þingi fyrir útgerðarfélagið Brim og LÍÚ.

Það er alveg dagljóst og kýsrskýrt, einkum kýrskýrt, að Árni Þór á ekki heima í vinstriflokki af nokkru tagi, allra síst flokki sem heitir Vinstrihreyfingin grænt framboð, enda var Árni Þór víðsfjarri þegar sá flokkur var stofnaður. Í þá daga var hin kýrskýra blók að basla í Samfylkingunni, en þar á bæ þótti hann svo ómerkilegur og tækifærissinnaður að honum var ýtt til hliðar eins og hverjum hverjum öðrum óþrifum.

Árni Þór, Björn Valur, Svandís Svavars, Steingrímur J. og  Álfheiður Ingadóttir ættu að sjá sóma sinn í að hypja sig úr VG á stundinni, helst fyrir hádegi í dag. Íslenskir sósíalistar hafa engin efni á að burðast með jafn fráhrindandi auðvaldslík í lestinni. Við höfum fengið nóg af klofningsliði eins og ykkur.

Óhætt að trúa fréttinni

Athugasemdir

[Ingibjörg Friðriksdóttir, 21.12.2010 kl. 12:19]

Ég tel mig fullgildan sosialista, en finnst að það ætti að rannsaka sálarlíf þeirra sem kosnir eru til að fara fyrir félagshyggjumálum á Íslandi.  Ef að íslenskir sósíalistar eru ekki nema 5% af þjóðinni, þá þurfa þeir (ég)(við) að reyna að afla félagshyggjulegri hugsun  fylgi, en ekki vera með snúð eins og þremenningarnir sem telja sig hinn heilaga sannleika.  Ég er mjög mikill sósíalisti, en ég tel mig hafa meiri samskiptagreind en þessir drullusokkar sem við höfum kosið yfir okkur.  HVað með að láta sér koma saman.  Þú svarar því aldrei Jóhannes?????

[Valdimar Samúelsson, 21.12.2010 kl. 12:24]

Vel mælt og nú er bara að gera áhlaup.

[Sigurlaug B. Gröndal, 21.12.2010 kl. 12:50]

Vel mælt!

[Jóhannes Ragnarsson, 21.12.2010 kl. 12:50]

Það fer eftir því hvað það er sem á að láta sér koma saman um, Ingibjörg. Ef samkomulag svokallaðra ,,vinstrimanna" á að ganga út á skjaldborg fyrir fjármagnseigendur, óbreytt kvótakerfi, inngöngu í auðvaldsbáknið ESB, borga Icesave reikninginn fyrir glæpamennina, einbeitt samstarf við AGS og endurreisn gamala Íslands, þá er ég ekki með og það eiga raunverulegir sósíalistar ekki heldur að láta bjóða sér.

Ég hef aldrei látið hvarfla að mér að núverandi ríkisstjórn sé vinstristjórn, hvað þá ,,hrein vinstri stjórn." Samfylkingin er hægri flokkur og þeir sem eiga og ráða yfir VG eru, sumir hverjir að minsta kosti, ansi óþægilega langt til hægri.

[Ingibjörg Friðriksdóttir, 22.12.2010 kl. 13:52]

Obbobobb!

Sammála því Jóhannes, algjörlega meira að segja.  Þetta er ekki sú vinstri stjórn sem ég vildi hafa séð.  En bíddu, eigum við þá bara að fara í stjórn með íhlandinu??  Eða bangsamunda?  Okkur finnst það undarlegt að það skuli ekki vera fjórðungur kjósenda á sömu skoðun og við. 

Hverskonar uppeldi hefur fólk fengið, það virðist vera glæpur að skifta með sér. Því miður er því þannig farið að börn nú til dags, graðka til sín og virðist sem þeim hafi verið kennt það. 

Ég er alin upp á Allaballaheimili, það var kosningaskirfstofa heima hjá mér með XG í glugganum, en ofar í götunni var XD og þar var traffikin ógurleg og börnunum var gefið sælgæti.

Ég man að ég var eitthvað að rífa kjaft heima og segja frá hversu ömurleg skrifstofa og flokkur Alþýðubandalagið væri, ekki einu sinni brjóstsykur í skál.

Mikill maður að vexti með þykkt hár, kallaði til mín og hélt ræðu svo gustaði af honum.  Þetta var Guðmundur J. Guðmundsson kallaður Jakinn.

Ég man innihald ræðunnar og seinna varð Gvendur Jaki vinur minn, eins og fjölskyldunnar allrar.  Ég er sósíallisti í húð en Framsóknarmaður í hár.  Semsagt, föðurfjölskyldan eru sósíallistar en móðurættin Framsóknarmenn.

Jóhannes, við verðum að afla félagshyggjunni fylgi á annan hátt en að vera reið daginn út og daginn inn.  Ég ætla að nota orð úr ræðu háttvirts núverandi borgarstjóra og athuga hvort þú leggir svipaðan skilning í þau orð og ég. 

Hann segir: að byggja upp hatur sé líkt og að taka inn eitur og búast við að einhver annar drepist af því.

Látum það ekki sannast á okkur rétt eina ferðina að félagshyggjufólk geti ekki unnið saman.  Hvað sem öðru líður með SF sem ég er búin að segja mig frá, þá kemst hún næst því að vera til vinstri, og okkur ætti að takast að þokast nær réttlætinu með henni.

Bændasamtökin og LÍÚ eru hagsmunamafía, sem á ekkert skylt við félagshyggju og löngu kominn tími til að stoppa.