Hann fer í fangelsi fyrir tiltækið

Helvíti var af honum Páli Baldvini að tala svona hræðilega illa um akranessögu Gulla Haralds, enda situr hann núna í þeirri súpu sem ekki séts til botns í. Ég fæ ekki betur séð, eftir að hreppsnefndin á Skaga, Gulli og KK útgefandi vígvæddust til höfuðs Páli Baldvin, en að karlanganum verði stungið í svartholið, því auðvitað biður hann ekki þessa fjandmenn sína afsökunar og velur ekki auðvirðilegan frið þegar ófriður við skagadrjóla er í boði. Ef svo fer að bókmenntagagnrýnandinn verði dæmdur til langvarandi fangelsisvistar upp á vatn og brauð fyrir hin hraksmánarlegu skrif um Sögu Akraness má geta sér til að þá þyki Skagamönnum að þá verði Jóns Hreggviðssonar loks að fullu hefnt fyrir hústrýkingar þær og innilokun í svarholinu sem hann mátti þola á sínum tíma að undirlagi illmenna að sunnan, sýslumanna og gagnrýnenda.

Ef allt fer á versta veg, verður Páll Baldvin dæmdur til, auk margra ára fangavistar, að skrifa nýja sögu þeirra Skagamanna og hafa í heiðri við þær skriftir fagurt umtal, hetjudáðir höfðingja á Akranesi svo sem eins og baráttu Guðbjarts Hannessonar fyrir afnámi veggjalda í Hvalfjarðargöngin og annað það sem gæti orðið íbúum Akraness til vegsauka í augum landa þeirra.  

Krefja Pál Baldvin um afsökunarbeiðni

Athugasemdir

[Jón Valur Jensson, 19.8.2011 kl. 01:26]

Þú ert makalaust góður penni, Jóhannes. -- Og fleiri en ég skelltu upp úr við að lesa kostulega fyndið innlegg þitt á Eyjunni í dag.

[Árni Gunnarsson, 19.8.2011 kl. 07:53]

Líklega skánar þetta rit svo til muna ef Páll verður þvingaður til að segja: Fyrirgefðu!"

Og svo verður fólki það ljóst hversu hundódýr vinna liggur að baki rituninni. - Án gamans:

Þessi söguritun er ávöxtur einhvers furðulegasta samnings sem um getur í íslenskri bókaútgáfu og ég óska höfundinum til lukku með að hafa haft forystumenn Akraness að flónum.

[Óli minn, 19.8.2011 kl. 18:08]

Mér finnst að einhver ætti að taka sig til og gera kvikmynd um þetta mál.

[Hrafn Arnarson (IP-tala skráð) 20.8.2011 kl. 07:28]

Mjög skemmtileg skrif og hæfa atburðum og persónum vel.