Ef annað hvort þeirra gefur kost á sér eru önnur framboð dauðadæmd

Ef félagi Ólafur Ragnar er orðinn leiður á að staðfesta lög úr ormagryfju Bjarna Ben og Sigmundar Davíðs og hugnast þar af leiðandi ekki að vera forseti lengur er einsýnt að mjög mun verða þrýst á frú Ingveldi að fara í forsetaframboð. Frú Ingveldur er sennilega sá kvenkostur hérlendis, sem flestar konur, einkum nútímakonur, eru tilbúnar til að fylkja sér um og berjast fyrir til síðasta manns. Það sem helst mælir á móti forsetaframboði frú Ingveldar, er að voldugar blokkir ættartengsla og fjármála í Framsóknar- og Sjálfstæðisflokki munu vera þess mjög fýsandi að ýta eiginmanni frú Ingveldar, Kolbeini Kolbeinssyni skrifstofustjóra og framsóknarmanni, útí forsetaframboð, enda sé hann þeirra maður í hvívetna.

Ef annaðhvort þeirra hjóna eða bæði fara í forsetaframboð, er einsýnt að framboð lítilfjörlegra smákvenna með allt á hælunum eru fyrirfram dauðadæmd. Það væri helst að vænta, að framboð stórbrotinna andlegra heljarmenna á borð við Árna Johnsen og Jón Gnarr (eða Hnerr einsog hann kallar sig stundum) gætu skákað framboðum sæmdarhjónanna frú Ingveldar og Kolbeins. Þá má ekki gleyma því, að nokkur stemmning er fyrir framboði Evu Hauksdóttur annarsvegar og Hildar Lilliendalh hinsvegar. Eru þá upptaldir allir hugsanlegir frambjóðendur, sem kunna að geta reytt ofurlítið fylgi að sæmdarhjónunum.

Síðast fréttist af frú Ingveldi og Kolbeini í þéttri sumarhúsabyggð á Suðurlandi, hvar þau börðust eins og ljón ásamt liðsveit þeirra við óða sumarhúsaeigendur nú um verslunarmannahelgina. Sumarhúsaeigendurnir bera sem sé frú Ingveldi og Kolbeini og þeirra fólki á brýn að haga sér óskikkanlega og að ekki sé viðlit að vera með börn í návist svona fólks. En frú Ingveldur og Kolbeinn eru því ekki vön að láta óbreyttan skríl eiga nokkuð inni hjá sér og svöruðu að bragði með því að lúberja sumarhúsaeigendur og flengja börn þeirra. Þessa stundina ríkir því stríðsástand í sumarbústaðahvefinu og allsendis óvíst hver lokaniðurstaðn verður.

Verður bitist um Bessastaði?