Jóhannes Ragnarsson

16.9.2017 | 08:14

Minningargrein um andaða ríkisstjórn

Já það var allan tímann eitthvert fargan á þeim í þessari ríkisstjórn, ef ríkisstjórn skildi kalla, trúi ég, og nú er hún berja nestið auminginn. Vanur maður sem kom að banabeði ríkisstjórnarinnar kvaðst aldrei hafa séð ljótari sjúkling og ugglaust muni líkið verða enn herfilegra um það bil sem það verður kistulagt. Þegar hefir verið ákveðið að dysja hræið af ríkisstjórninni utangarðs, án yfirsöngs og Guðs blessunar; það kom sem sé upp úr dúrnum þegar að var gáð, að Frelsarinn hafði ásamt mögrum öðrum andstyggð á ríkisstjórnarnefnu þessari og lét þess getið að orð sín um ríka manninn, úlfaldann og nálaraugað væru enn í fullu gildi og þar með væri óviðeigandi með öllu að greftra það innan um annað fólk í vígðum reit. Að öllu samanlögðu er þó rétt að fara þess á leit við Drottinn Sjálfstæðismanna, Mammon, að láta þennan hráslaga- og slepjulega þjón sinn í friði fara.

Smánarlegast þykir þó að andlát ríkisstjórnarinnar hafi borið að með þeim hætti sem á varð og banamein hennar í senn skammarlegt og óguðlegt; að tveir pervertar og ein agnarsmá flokksnefna hafi orðið til þess að heil ríkisstjórn með sjálft erkiauðvaldið og höfuðból borgarastéttarinnar, Sjálfstæðisflokkinn, innanborðs hafi orðið til þess að þríeinn guð Sjálfstæðisflokksins gliðnaði sundur og féll fyrir ætternisstapa eins og hvur önnur saurskriða. Það góða við andlát ríkisstjórnarinnar er að þjóðin gleðst yfir falli hennar og ætlar sér í engu að heiðra minningu hennar, fremur en dauða ókunnugs útgangsrakka sem verið hafði fólki hvimleiður fyrir margra hluta sakir.

Og vissulega var hin látna ríkisstjórn, sem fær sitt formlegt dánarvottorð um hádegisbil í dag, veik, fárveik, alla sína aumu ævi. En það var ekki af því að eitthvert lím í henni hafi verið veikt, eins og stjónmálafræðingurinn segir, heldur stafaði sjúkdómurinn af eðli hennar, arðráns- og auðvaldseðlinu, sem skipaði henni að halda áfram að eyðileggja samfélagið með ósvífnum ránum og gripdeildum á eigum þess í þágu gráðugar einkvæðingar og frjálshyggjuóra. Og sannast nú sem fyrr orð Hallgríms sáluga Péturssonar:

Sjá hér hvað illan enda
ótryggð og svikin fá.
Júdasar líkar lenda
leiksbróður sínum hjá.
Andskotinn íllskuflár
enn hefir snöru snúna
snögglega þeim til búna
sem fara með fals og dár.

Og enn fremur:

Undirrót allra lasta
ágirndin kölluð er.
Frómleika frá sér kasta
fjárplógsmenn ágjarner
sem freklega elska féð.
Auði með okri safna,
andlegri blessun hafna
en setja sál í veð.