Valvan inná Vog fyrir 15. jan. 2008

Ég er ansi hræddur um að Völvu-garmurinn hafi verið drukkin þegar hún var að brasa við að spá fyrir næsta ár. Ég á þá ekki við að hún hafi verið svona sætkennd og samkvæmishæf heldur blindfull - moldþreifandi mígandi dauðadrukkin. Að láta sér detta í hug fólk sem kysstist á munninn á Þingvöllum í vor slíti ástúðlegu sambandi sínu sisvona á næsta ári nær nattúrlega ekki nokkurri átt. Þessháttar óraðshjal vellur ekki uppúr nema langdrukknu ógæfufólki. Og að Reykjavíkurmeirihlutinn verði sprengingu að bráð á næsta ári undirstrikar ömurlegt ástand Völvunnar því umræddur meirihluti sprakk á þessu ári en ekki því næsta. Þórarinn Tyrfingsson er ekki öfundsverður að þurfa að afeitra Völvuskjátuna inni á Vogi eftir áramót, en ég spái að komið verði með hræið í morauðum strigapoka og því sturtað inná mitt gólf á Vogi fyrir 15. janúar 2008. 

Völvan spáir stjórnarslitum

Athugasemdir

[Júlíus Valsson, 28.12.2007 kl. 19:32]

Eru ekki einhverjar skárri spákonur þarna undir Jökli?

[Jóhannes Ragnarsson, 28.12.2007 kl. 19:54]

Sem betur fer eru ekki neina spákonur meðal okkar undir Jökli og ekki spámenn heldur - fyrir utan mig náttúrlega. Enda er ég spámannlega vaxinn, svo ekki sé meira sagt.

[Ingibjörg Friðriksdóttir, 28.12.2007 kl. 20:01]

Ég held að hún, Valvan búi á Silungapolli.

En hverju spáir þú Jóhannes? 

[Jóhannes Ragnarsson, 28.12.2007 kl. 21:45]

Í Orðabók Máls og Menningar frá árinu 2000 má finna orðið ,,valva" í merkingunni ,,völva." Að því gamni slepptu er ég helst á því að ég hafa ruglast á ,,völvu" og ,,völsku," sem beygist, valska um völsku frá völsku til völsku - þó því fari fjarri að ég ætli til eða sé nýkominn frá völsku eða völskum enda hefi ég mátulegan ýmigust á því arma kvikindi.

Hvort Völvutötrið búi á Silungapolli veit ég ekki, en mig minnir að fátt sé um húsakynni á þeim bæ nú um stundir. Svo skulom vér sjá til hvort ég nenni að spá einhverju til eða frá á næstunni.

[Jóhannes Ragnarsson, 28.12.2007 kl. 21:49]

Ertu að spurja mig um heimilisfesti, Ragnar minn Örn? Ef svo er, get ég frætt þig á því að mitt lögheimili er að Hábrekku 18 í Ólafsvík - ekki Snæfellsbæ. 

[Ingibjörg Friðriksdóttir, 28.12.2007 kl. 22:59]

Fyrirgefið, afsakið, íslenskan er svo erfið, en auðvitað er það alveg rétt hjá Ragnari Erni að Völvan býr einhverstaðar, á meðan valvan finnst allstaðar og hvergi.

Ég hef nú samt þann háttinn á að skoða innihaldið og merkinguna, frekar en uppröðunina, enda afspyrnu léleg í að raða saman nokkrum sköpuðum hlut. Hefði að öllum líkindum valið að verða rithöfundur, ef ég væri ekki svona léleg í móðurmálinu.

En ef Völvan sem á reyndar að skrifa með litlum staf, gæti fengið far með Ottesen airlines á Vog, því það félag var stofnað á suðurlandi, þegar Silungapollur var og hét, en Vogur var einungis þekktur af Bjarna nokkrum.

Ertu Ólsari Jóhannes? 

[Jóhannes Ragnarsson, 29.12.2007 kl. 01:15]

Í fyrsta lagi er ég fróðhreppingur og í öðru lagi ólsari. En þetta tvennt er hérumbil sama tóbakið.

Í þriðja og síðasta lagi skulum við ekki velta okkur mikið uppúr lögformlegum stafsetningarreglum og þvíumlíku - það virkar hamlandi á skriftargleði fólks.

[Ingibjörg Friðriksdóttir, 29.12.2007 kl. 17:01]

Segðu mér Jóhannes, þekktir þú Emmanúel heitinn?

[Jóhannes Ragnarsson, 29.12.2007 kl. 17:27]

Emanúel heitin Guðmundsson þekkti ég eins og allir milli Ólafsvíkurennis og Búlandshöfða. Hann var einn af þeim mönnum sem settu svip sinn á bæinn, eins og sagt er. Hvernig þekktir þú Emma?

[Ingibjörg Friðriksdóttir, 31.12.2007 kl. 00:22]

Sendi þér póst á [e-mail] til að upplýsa kunningsskapinn