Sterkir listar fyrir hverja?

,,Ég held að þetta sé bara flott. Við vorum með gott framboð af fólki og fáum sterkan lista útúr þessu" gaggar tónlistarhússbruðlarinn Katrín Jaki, rígmontin að vanda eins og sönnum VG-streðara ber að vera.

En bíðið hægir lesendur góðir.

Fyrir hvern eða hverja verða listar VG í Reykjavík sterkir? Þeir verða eflaust sterkir fyrir efri-millistéttar og yfirstéttarfémínísta og samtryggingarkerfi flokkseigendafélaga stjórnmálaflokkana. En fyrir fólk í verkalýðsstétt verða þeir til alls óbrúklegir. En þessháttar skilja fratkanónur á borð við Katrínu Jaka og aðrir úr hinu sjálfumglaða bómullarumhverfi háslólalóðarinnar auðvitað ekki, enda ósanngjarnt að slíkt gáfufólk skilji allt milli himins og jarðar.

Sterkur endurnýjaður hópur

Grobbin Sendiherradóttir hefur upp innantóma raust sína

Það er svosem ekki nema eðlilegt að Sendiherradóttirin sé ánægð með lífið og tilveruna í dag, enda undantekningarlaust ágætlega grobbin í hvert skipti sem hún kemst í kast við fjölmiðla. Og ekki munar Swandeesy um að halda því fram að listar VG í Reykjavík verði heiftarlega sterk blanda reyndra pólitíkusa og aktívistum úr ,,búsáhaldabyltingunni" svokölluðu. Þessi skáldlega lýsing frúarinnar hljómar á áfengismáli svona eins og verið sé að bera á borð blöndu af vodka 75% og Southern Comfort þó að í reynd sé bara um vantsblandaða undanrennu að ræða.

Þó að ég búi í 200 kílómetra fjarlægð frá Reykjavík hef ég samt í þrígang tekið mig upp til að mæta á útifundi Harðar Torfa og félaga á Austurvelli. Það hefur vakið athygli mína, að í ekki eitt einasta skipti hef ég komið auga á svo mikið sem einn þingmann VG, hvað þá heldur Swandeesy, Hjörleif eða Sendiherrann í Kaupmannahöfn. Hinsvegar sá ég Þorleif Gunnlaugsson borgarfulltrúa VG í öll skiptin, og eru þá allir upptaldir sem ég sá af forystufólki VG á umræddum útifundum.

Vinstristjórn lífsnauðsyn

Vanþakklát kerlingarbora, kraftaverk og skömm

Kolbrún Halldórsdóttir Guttormsson er stolt og keik þrátt fyrir skúffelsi með árangur sinn í prófkjörsforvalinu í gær. Það er náttúrulega algjört vanþakklæti hjá kerlingarborunni að vera hundóánægð með að lenda í sjötta sæti því það gengur kraftaverki næst að hún skuli yfirleitt fá eitt einasta atkvæði í svona kosningu. Kolbrún, Katrín, Álfheiður í fiskeldinu, Sendiherradóttirin og vandræðablókin Árni Þór mega mega þakka sínum framagosaguði fyrir hve félagsmenn VG í Reykjavík eru illa haldnir af dómgreindarskorti og pólitískri alblindu. Það er algjör skömm að því að hreyfing sem skreytir sig með ,,vinstri" nafnbót skuli vera jafn ofurseld tækifærissinnum og pólitískum náttúruleysingjum og raun ber vitni. Ég legg til að VG breyti nafni flokksins, fjarlægi orðið ,,vinstri" úr nafninu og kalli sig eftirleiðis Hjörleifshreyfinguna grænt framboð, Svavarvædduhreyfinguna eða Steingrimsjhreyfinguna. ,,Ríkisstjórnarhreyfingin mislitt framboð" væri líka ágætt nafn á fyrirbærið því VG er ríkisstjórnarsjúkur flokkur, boðinn og búinn að selja æru sína fyrir ráðherrastól undir rassinn á formanninum.

Keik og stolt í sjötta sætinu

Ágætlega hægrisinnuð finngálkn

Það verður ekki annað sagt um félagsmenn VG í Reykjavík, í ljósi úrslitanna í forvalsprófkjörinu þar á bæ, en að þeir séu ágætlega hægrisinnaðir miðað við að þeir eru félagar í samtökum sem kalla sig ,,Vinstrihreyfingu." Það er auðvitað hlálegt, ef ekki stórhlægilegt, að pólitískir leikarar með litla sem enga pólitíska sannfæringu til vinstri hafi hafnað í tveimur efstu sætunum í kosningu hjá stjórnmálaflokki sem kveðst vera róttækur vinstriflokkur. Það segir líka sína sögu að finngálkn eins og Árni Þór og Kolbrún Halldórs eru á meðal tíu aflahæstu atkvæðafiskaranna á þessari umhugsunarverðu prófkjörsvertíð vinstrigrænna. Þessi ósköp segja mér líka það, að ef þeir kompánar í hægri-vinstrimennskunni Hjörleifur, Steingrímur J. og Svavar Sendiherra legðu til útigangskött eða tískuhund myndu slíkar skepnur fá glimrandi kosningu hjá VG-ingum í Reykjavík. Svo einfalt er það.

En ansi held ég verði erfitt fyrir raunverulega vinstrimenn úr verkalýðsstéttinni, sósíalistana, að ganga að kjörborðinu í Reykjavík í kosningunum í vor og hafa ekki úr öðru að moða en Katrínu Jakobsdóttur og Ingibjörgu Sólrúnu.

 

Katrín og Svandís efstar

Hverjir eru þessir frjálshyggjudraugar sem mokuðu yfir þjóðina?

Það væri nytsamt fyrir óbreytt alþýðufólk að fá að sjá, svart á hvítu, hvaða persónur það eru sem fylla flokk róttæku frjáshyggjumannana sem Stebbi professor Ólafsson var að spjalla um á Hótel Borg í kvöld. Fólk þarf nefnilega að þekkja þá sem þarf að varast, ekki síst þegar um stórhættulega þjóðníðinga og landráðamenn er að ræða. Sjálfur yrði ég bæði lang- og þverskuðarmát ef ég væri beðinn um að telja upp þessa skaðræðis frjálshyggjuperra.

Hrunin frjálshyggjutilraun

Undirlagðir af íllskuæði útí þjóð sína

Þó að Sjálfstæðisflokkurinn sé að fá 25-30% í skoðannakönnun þá þýðir það að þessi alþýðufjandsamlegi flokkur fær ekki nema 20-25% í kosningum því hann fær alltaf minna fylgi í kosningum en í könnunum. Þetta vita áhangendur auðvaldsmaskínunnar, ,,sjálfstæðismennirnir" svokölluðu. Enda berast fregnir úr ýmsum áttum að íhaldskarlar og kerlingar séu viti sínu fjær af hræðslu um þessar mundir við að nú séu völdin að renna þeim úr greipum. Og víst hafa dýrin unnið fyrir hræðslunni, fyllilega. Raunar líkist íllskuæðið sem runnið er á arðránssinnana í Sjálfstæðisflokknum geðslagi þarfanautsins sem fékk tannpínuna hér um árið; það reif sig laust af básnum, banaði öllum kúnum, eiginkonum sínum, með hornunum, og stangaði síðan fjósið í rúst svo þar stóð ekkert uppi. Þegar bóndinn kom á vettvang var ekkert eftir þar sem fjósið stóð áður nema dauðar kýrnar, bárujárnsplötur og spýtnabrak, en tuddinn stokkinn öskrandi á næstu bæi til að svala vonsku sinni og mannfyrirlitningu.  

Sjálfstæðisflokkur með mest fylgi

Óráðsþrugl og framsóknaróráðvendni

Þegar talað er um ,,vinstri stjórn" er ekki sem verst að hafa í huga að, að slíkum stjórnum standa vinstri flokkar, einn eða fleiri. Ríkisstjórn sem Framsóknarflokkurinn ætti aðild að gæti t.d. aldrei kallast vinstri stjórn, einfaldlega vegna þess að valda- og peningasamtök Framsóknarmaddömunnar er hreinræktaður auðvaldsklúbbur og arðræningja. Af þeim sökum flokkast hjal Sigmundar Davíðs um aðild Framsóknar að vinstri stjórn undir óráðsþrugl í anda blekkinga og venjulegrar framsóknaróráðvendni. Og svo slæmur er Framsóknarflokkurinn að hann á hvergi heima nema í hrútastíunni á höfbólinu, hjá hinu glæpasinnaða Erkiíhaldi. 

Vill vera í vinstri stjórn

Ósvífin afsökunarbeiðni

Það þýðir nú lítið fyrir frú Ástu Möller einkavæðingarfrík að biðjast afsökunar á ólánsverkum sínum og trúsystkyna hennar í Sjálfstæðisflokknum; það tekur enginn maður með fullu viti við þessháttar beiðni. Afsökunargrátur af þessu tagi er furðu ósvífin því hann er fyrst og fremst tilraun til að afla samúðar hjá nytsömum sakleysingjum og villa þeim sýn; fá þá til að loka augunum fyrir glæpnum sem þeir voru beittir.

Baðst afsökunar á mistökum

Óráðsmal syfjaðra þúfutittlinga

Þetta uml í strengjabrúðu Finns, Halldórs, Óla á Miðhrauni og Alfreðs minnir óneitanlega á fátt annað en óráðsmal langdrukkinnar fyllibyttu sem er við að lognast útaf. Ef þessi syfjaði þúfutittlingur væri með réttu ráði myndi hann ekki taka sér í munn orðin ,,rjúkandi rúst" einfaldlega vegna þess að eftir frjálshyggjudjöfladans Framsóknarmaddömunar við erkiíhaldið var efnahagslíf þjóðarinnar ein stór og fremur óhugguleg rúst sem rauk uppaf, - og rýkur enn uppaf. Og um skyndilegan áhuga léttadrengjanna í Framsóknarfjósinu á ,,stjórnlagaþingi" er best að segja sem fæst, en að mínu mati lýsa oðrin ,,fals, hroki og lýgi" þessu nýjasta hugarfóstri Maddömunnar alveg þokkalega.

Vill rjúfa þing 12. mars

Kjósum hann inná Hrafnistu eða Grund

Það verður aldeilis höfuðverkur fyrir vesalings samfylkingarfólkið að kjósa sér mannskap í þessi 8 efstu sæti sem í boði eru. Það er t.d. ekki hrist fram úr erminni að gera uppámilli Ástu Ragnheiðar og Péturs Tyrfings eða Önnu Pálínu og Skúla Helgasonar. Svo er þarna fullt af liði sem ógerningur er að kjósa, þar á meðal bjöllusauðir sem hafa ekki hugmynd um hvað snýr upp og hvað niður í tilverunni. Þó er meðal prófkjörslukkuriddaranna maður nokkur sem hefur algjöra sérstöðu innanum öll hin; en þar á ég auðvitað við þann ótrúlega Jón Baldwin Hanníbalsson. Þann mann er auðvitað ekki hægt að kjósa nema inn á Hrafnistu eða elliheimilið Grund, en því miður er sá hængur á að enn hefur ekki verið tekið uppá að kjósa fólk inná þá staði í almennum kosningum eða prófkjörum.

20 bjóða sig fram fyrir Samfylkingu í Reykjavík