Læknisvottorð uppá lygaveiki

Í gærkvöldi gaf Dagur B. Eggertsson læknir út læknisvottorð þess efnis að Ólafur F. Magnússon læknir sé lygalaupur. Því miður er ég ekki svo kunnugur læknisfræði og læknisvottorðum að ég geti fullyrt hvort hægt sé að dæma menn óvinnufæra sökum lygaveiki, en það liggur samt í augum uppi að krankleiki á borð við ósannsögli er fremur hvimleiður sjúkdómur, nema ef til vill í stjórnmálum þar sem snjallir lygarar eru metnir að verðleikum. Svo getur það náttúrlega gerst að menn og konur geta orðið svo heltekin af illvígum lygasjúkdómi að þau verði gjörsamlega óvinnufær. Þess vegna legg ég til að skipuð verði nefnd lækna sem fái það hlutverk að meta meintan skort Ólafs F. Magnússonar á sannleiksást og enn fremur hvort ekki geti verið hættulegt að láta hann ganga lausann.

Dagur: Óvanur því að samstarfsmenn segi ekki satt

Haltur leiðir blindan

Mikið ósköp voru þeir álappalegir Vilhjálmur og Ólafur F. þegar þeir tilkynntu blaðamönnum og alþjóð um vel unnið dagsverk. Þar mátti sjá tvo útbrunna stjórnmálamenn reyna að klóra í vonlausan bakkann með heila hersveit af hnífasettaliði á bakvið sig. Afturámóti spái ég stórtíðindum á vettvangi landsmálastórnmálanna innan skamms. Um það vitna viðtöl við Ögmund Jónasson, Valgerði Sverrisdóttur og Dag B. Eggertsson í sjónvarpinu í kvöld.

Ólafur og Vilhjálmur stýra

Samfylking sparki Íhaldinu úr ríkisstjórn

Mikið eru nú Reykvíkingar heppnir með bæjafulltrúa hjá sér. Ekki er annað að sjá en það séu allnokkuð fleiri í þeim fríða hópi en Björn Ingi sem ganga dags daglega um með hnífasett þess albúnir að reka hvuta sína á kaf í bakið á næsta kollega. Það væri mikið gustukarverk að afvopna þessa skæruliða og eiginhagsmunaseggi með því að efna til borgarstjórnarkosninga nú þegar. Ef einhver döngun og dirfska væri í Samfylkingunni ætti hún skilyrðislaust leita hefnda fyrir Dag og hans fólk með því að fleygja Sjálfstæðisflokknum eins og sullaveikum hundi út úr ríkisstjórn og mynda nýjan meirihluta á Alþingi með VG og Framsóknarflokki.

Nýr meirihluti í Reykjavík

Styðja orðljóta götustráka

Það vekur vissulega furðu að gleðipinnarnir í SÚS skuli verja sínum merkilega tíma í að mótmæla því að einhverjir orðljótir glæfrapjakkar og götustrákar í Hvíta-Rússlandi séu teknir úr umferð. Eða eru SÚSarar meðmæltir því að rustafengnir óknyttadrengir fái að valsa um götur og gangstéttir hreytandi dónaskap og hávaða framaní saklausa vegfarendur? Ef svo er, má fastlega búast við að litlir, vansgreiddir prumphanar með þverslaufur fari að abbast uppá fólk í miðborg Reykjavíkur með kjaftsteytingi og skítaskap. Nær væri þeim andríku frjálshyggjupottormum í SÚS að glíma við að mótmæla pólitískum ráðningum í heimalandi sínu, einkavinavæðingu og botnlausri fjármálaspillingu.   

SUS mótmælir handtökum í Hvíta-Rússlandi

Ölvaðir framsóknarmenn í slagsmálum

Þegar ég sá fyrirsögnina að meðfylgjandi frétt varð mér fyrst fyrir að halda að þar væri á ferðinni enn eitt birtingarformið á innanbúðarfangbrögðunum í Framsóknarfjósinu. En í því ágæta fjósi stunda menn handalögmál í flórnum, fullir jafnt sem ófullir. Svo kom á daginn að þarna hefðu bara ofurölvi njarðvíkingar að basla við að slást. Það þótti mér skítt. Þó er ekki öll nótt úti enn með að hinir kappsömu njarðvíkingar séu eftir allt saman góðir framsóknarmenn sem hafi lent í hári saman útaf sérlegum sparikosningafötum Björns Inga, búrsöxum hans og hnífapörum. Þó má vel vera að hinir druknu útnesjamenn hafi verið að slást út af kvenmanni - sem er svo sem ágætt útaf fyrir sig. Ég verð þó að viðurkenna að mér finnst fyrri tilgátan samt mun betri og sennilegri.

Ofurölvi í slagsmálum

Friðarhöfðingi ræðst á særðan mann

Er nú ekki gamli rafturinn Halldór Ásgrímsson á sjó dreginn til að kynda betur undir bálinu í Framsóknarfjósinu sem var þó alelda fyrir. Og hinn roskni kvótahöfðingi er ekkert að liggja á liði sínu heldur hjólar beint í særðan liðþjálfa sem liggur gólandi í valnum með fjöld búrhnífa í bakinu eftir dáindissveininn Björn Inga sem af einhverjum ástæðum virðist vera sérdeilis hjartfólginn hinum mikla jarli sem einhverjir bjartsýnismenn héldu fram að væri sestur í ,,friðarstól." Það er þá aldeilis ,,friðarstóllinn atarna."  

Ómakleg framganga

Grafreitur jarðsunginn

Lengi hefi ég vaðið þá villu í heimsku minni, að það sé bara fólk, já og í einstaka tilfelli sárlega syrgð gæludýr, sem eigi að fá að hvíla í friði í grafreitum sínum. Nú kemur á daginn, og það úr munni sjálfs Börns Bjarnasonar kirkjumálaráðherra, að það eru grafreitirnir sjálfir sem eiga að hvíla í friði. Af orðum kirkjumálaráðherra má skiljast, að hann, ásamt Öszuri vini sínum og öðrum meðreiðarsveinum í Þingvallanefdinni góðkunnu, hafi fyrir margt löngu borið Þjóðargrafreitinn á Þingvöllum til grafar með hefðbundnum yfirsöng klerka og óskum um að hinn burtliðni grafreitur fái um alla framtíð að hvíla í friði. Ef þannig er í pottinn búið er náttúrlega fráleitt raska ró hins látna grafreitar með því að slaka oní hann dánu fólki, hversu geníalt sem innihald þess hefur verið í lifanda lífi, eins og félagi Þórbergur hefði sagt.  

Grafreiturinn fái að hvíla í friði

En þegar hann var fleingdur ...

Þegar hann var hýddur spratt hýðingin af nauðsyn, það var réttlætið ... En þegar hann var fleingdur, þá var hann aldrei flengdur mjög mikið, bara dulítið, af því að réttlæti guðs er óumflýanlegt. Guð refsar öllum sem svíkjast um ... 

Reiddist þegar snjó var kastað í bílinn

Guðjón Ólafur skoraði grimmt í Silfrinu

Ég gat ekki betur heyrt á Guðjóni Ólafi í Silfri Egils en að bréfið góða sem hann sendi flokkssystkynum sínum til hugleiðingar á dögunum hafi allsekki verið vanhugsað af hans hálfu, heldur þvert á móti hafi það verið vel ígrundað og saman sett af gefnu tilefni. Satt að segja fór Guðjón Ólafur á kostum í Silfrinu og mátti Egill Helga klippa á viðtalið fyrr en ráð var fyrir gert því við sjálft lá að hann færi að skellihlægja upphátt hvað eftir annað á meðan spjallgestur hans lét móðann mása.

Segja bréf til framsóknarmanna vanhugsað

Ónotalegt dauðastríð gamallar konu

Heldur virðist heilsa blessaðrar Framsóknarmaddömunnar fara hrakandi, enda níræð orðin, fótfúin og hjartveik. Svona lagað er kallað öldrunarsjúkdómar og eru, einsog dæmin sanna, illviðráðanlegir og eiga það sameiginlegt að enda allir á sama veg. Ofan á áðurnefnda öldrunarsjúkdóma hefur svo gamla maddaman mátt stríða hin síðari ár við skæðan iðrasjúkdóm sem virðist öðru fremur ætla að fækka nokkuð hérvistadögum gömlu konunnar. Nú síðast lagðist Maddaman í lokrekkju sína með heiftarlegt iðratak og hefur ekki getað fylgt fötum síðan. Það sem lagði þá gömlu öðru fremur í bólið að þessu sinni og olli iðratakinu var að innanmeinið Guðjón Ólafur, fyrrumþingmaður, tók sig til og skrifaði bréf í sínum anda í þúsundatali sem hann spúði síðan eins og skítadreifari út um allan framsóknarlíkamann. Auðvitað hefur innspýting af þessu tagi eiturverkandi áhrif á gamlan kropp. Og er nú svo illa komið að meira að segja elsku drengurinn Björn Ingi Borgarfulltrúi er kominn á fremsta hlunn með strjúka út um taðhúsdyrnar á haughúsi Framsóknarfjóssins og yfirgefa þar með Maddömuna níræðu á ögurstund. Og víst er um það að Maðurinn Með Ljáinn er farinn að stjákla óþolinmóður um á fjósstéttinni Framsóknar, þess albúinn að líkna gömlu konunni.       

Björn Ingi úr Framsóknarflokki?