Teprulegir uppskafningar með háþróað lyktarskyn

Aumingja blessaðir kennararnir að þurfa að vinna í svona ógurleg miklu ryki og skít, þeir gætu allir dáið drottni sínum einn góðan veðurdag. Og hver á þá að kenna börnunum þegar kennararnir verða fallnir frá? Eða verða börnin máske köfnuð líka í rykinu og skítnum? Það er augljóst að kennarastarfið er ekki fyrir veimiltítur og steinkvatnsdömur með háþróað lyktarskyn enda getur svoleiðis fólk ekki kennt nokkrum manni nokkurn skapaðann hlut. Til að verða nothæfur kennari þarf viðkomandi að hafa starfað að minnsta kosti í fimm ár við sjómennsku, fiskverkun eða í álveri áður en forsvaranlegt er að hleypa honum í uppfræða börn. Það segir sig sjálft, að teprulegir uppskafningar með enga lífsreynslu, nema eftir vill af helgarfylliríum, hafa engu að miðla fram yfir þann innantóma snobbkuntulærdóm sem þeir af tilgangsleysi sínu hafa komið sér upp.

Skítur í dönskum skólum

Dúxasótt er hættuleg veiki

Það er alkunna, að þeir sem þjáðst hafa alla sína skólatíð af krónískri dúxasótt enda ævinlega sem rukkarar eða gengilbeinur á hamborgarasjoppum að undanskildum þeim dúxum sem verða utangátta á allan hátt og komast aldrei inná kortið. Ég þekki einn sérdeilis frambærilegan menntaskóladúxara sem gerðist sérfræðingur í að bora í nefið á sér og segja um leið, ,,helvítis bölvuð slepja er þetta." Þetta dúxmenni tók uppá á þeim hvimleiða sið, þegar hann var kominn á miðjan aldur, að drekka brennivín af þeim sanna eldmóði sem dúxum einum er gefinn. Samhliða vínmenningarátaki þessa manns fór hann að eltast við aðra karlmenn með hvílubrögð í huga. Loks var karlganginn tekinn úr umferð og lokaður inni á geðveikrahæli.

„Reyni að gera mitt besta“

Jómfrú Íslands er framtíðin

Aumingja blessað barnið að vera kjörin ungfrú Ísland, og ekki nema átján ára; það er varla hægt að hugsa sér stærra ólán. Svo halda þeir ,,fullorðnu" áfram að spila með hana, eins og gert er við nýliða til sjós, þangað til að þeir fá leið á henni og kjósa sér aðra ungfrú Ísland. Og foreldrar barnsins, hvernig taka þeir þessum ósóma? Varla með húrrahrópum og stríðshoppi?

Það er mín bjargföst meining að það eigi að leggja leikinn Ungfrú Ísland niður, en aka þess í stað upp keppnina Jómfrú Íslands. Það væri bæði kristilegt og uppbyggilegt. Jómfrú Íslands yrði strax afar virðingar- og eftirsóknarverð nafnbót fyrir ungar konur og hefði í för með sér að skírlífi kæmist í tísku. Eina skilyrðið fyrir þátttöku í slíkri keppni væri að vera 100% jómfrú með vottorð þess efnis frá lækni uppá vasann. Að vera kjörin Jómfrú Íslands fæli í sér mikla möguleika uppá framtíðina fyrir viðkomandi. Þessháttar konur kæmu til með að verða mjög eftirsóttar í skólastjórastöður og á framboðslista Sjálfstæðisflokksins, svo fátt eitt sé nefnt. Og ekki þarf að efa, að foreldrar yrðu mjög stoltir og upp með sér af dætrum sínum sem tækju þátt í keppninni Jómfrú Íslands.   

Guðrún Dögg valin Ungfrú Ísland

Sérstaki ruddafanturinn og athafnaþjóðskáldin

Hverskonar helvítis ódráttur er þessi ,,Sérstaki Saksóknari"? Braust inn á heimili Ólafs Ólafssonar, sem er valinkunnur sómamaður og bóndi að Miðhrauni á Snæfellsnesi, og sneri þar öllu á hvolf og skildi Ólaf bónda eftir hágrátandi og verulega miður sín. Nú er spurningin hvort fleiri góðmenni megi eiga von á að sá ,,Sérstaki" ryðjist inn til þeirra  og hafi í frammi dólgslæti, aðdróttanir og munnsöfnuð. Ég hefi t.d. verulegar áhyggjur af því að hinn Sérstaki ruddafantur beri næst niður hjá athafnaþjóðskáldinu Finni Ingólfssyni. Það má aldrei gerast. Nú verða þjóðhollir íslendingar að skynja hvað til þeirra ábyrgðar heyrir og slá skjaldborg um athafnaþjóðskáldið og verja það til síðasta manns fyrir árásum Sérstaka Saksóknarans, sem bersýnilega er gerður út af öfundarfólunum Jóhönnu og Steingrími J. 

Leitað á heimili Ólafs

Það verður mannfall - meira segi ég ekki

Það er ekki heiglum hent að hnusa uppúr hlandkoppum í afkimum Framsóknarfjóssins hvar sú gamla Maddama hefur gert stykkin sín til dýrðar húskörlum sínum velþénanlegum. Mér kæmi ekki á óvart þó að það verði mannfall í hersveitum Sérstaks Saksóknara þegar þeir fara að anda að sér eiturgufum á borð við Q Iceland Finance ehf. Þá verður varla minna mannfall þegar lið ,,hins Sérstaka" gerir innrás í Valhöllu, arnarhreiður sjálfs erkiíhaldsins þar sem bakteríugróður spillingar og undirferlis hefur grassérað óáreittur áratugum saman; það þarf ekki annað en að reka blá-trýnið inní sægreifakompuna þar á bæ til að bíða varanlegt tjón á heisu sinni, svo eitrað og andstyggilegt er andrúmsloftið þar.

Hús sem veggjatítlur hafa tekið sér bólfestu eru ævinlega brennd til kaldra kola við fyrsta tækifæri. Slíkt hið sama á að gera við ólifnaðarbælið Valhöllu við Bolholt í Reykjavík. 

Húsleit gerð á 10 stöðum

Vitfirringahæli fyrir úrbrædd FramsóknarÍhöld

Ég held að félagi Steigrímur J. hafi lög að mæla þegar hann segir, að fólk verði að fara að horfast í augu við hversu alvarleg staða ríkissjóðs er. Eins og við var að búast, hitti helstefna nýfrjálshyggjukapítalisma Sjálfstæðisflokks og Framsóknar þjóðina fyrir með óhugnarlegu brauki og bramli. Hinsvegar láta helvísk framsóknaríhöldin eins og lítið sem ekkert hafi í skorist, vandinn sé smár og hann sé hægt að leysa með einföldu sjónhverfingartrixi. Svo kóróna þessir boðberar fjálshyggjukapítalismans heimskuna í sér með því að eyða dýrmætum tíma Alþingis í argaþras og þref um þingflokksherbergi og til að verja kvótaránsmafíu LÍÚ. Þetta kallar maður nú að ganga hreint til verks.

Það sér hver heilbrigður maður að ekki verður lengur undan því vikist að koma á laggirnar vitfirringahæli fyrir veruleikafirrta og úrbrædda stjórnmálamenn.

Framsóknarmenn í afneitun

Stálu öllu sem þeir komu höndum yfir

Einusinni voru svona stofutónleikar haldnir heima hjá Kolbeini kunningja mínum Kolbeinssyni og frú Ingveldi eiginkonu hans. Sex manna hópur með hávaðatól í eftirdragi kom glamraði í um það bil klukkutíma, öllum áheyrendum til leiðinda og óþæginda. En þar með var ekki öll sagan sögð: Tónlistarmennirnir í stofusextettinum notuðu tímann vel heima hjá Kolbeini og stálu öllu sem þeir komu höndum yfir á heimilinu og höfðu á brott með sér; maturinn sem geymdur var í kæliskápnum, áfengið í vínskápnum, snyrtivörur þeirra hjóna á baðherberginu ásamt einu og öðru lauslegu hvarf eins og jörðin hefði gleypt það. Kolbeinn og frú Ingveldur kærðu þjófnaðinn því þau eru ekkert uppá það komin að láta stela frá sér. En það hafði nú lítið uppá sig: Meðlimir sextettsins sneru samstundis vörn í sókn og kærðu Kolbein og frú Ingveldi til baka fyrir ærumeiðingar og upplognar sakir og fengu þau dæmd til allhárra fébóta. Af framansögðu má auðveldlega draga þá ályktun að stórhættulegt sé fyrir húsráðendur að hleypa hljóðfærafólki inn til sín til stofutónleikahalds. Ég skora því á saklaust fjölskyldufólk að varst vítin og reka alla stofutónleikahaldara af höndum sér um leið og þeir knýja dyra.

Stofutónleikar hefjast í dag

Aðalsteinn á að sjá um framkvæmdina sjálfur

Nú held ég að Aðalsteini Baldurssyni, vini mínum, hafi tekist að brjóta múrinn sem þarf til þess að vera talin fullkomlega genginn af göflunum. Það er mikil kórvilla hjá Aðalstein og hans stjórn í verkalýðsfélaginu að standa í því með gengdarlausum fjáraustri að láta Jónínu Ben setja verkafólki og sjómönnum í Þingeyjasýlu stólpípu með volgu vatni og sápuglussa. En fyrst Aðalteinn er svona viss um að það sé fortakslaust brýn nauðsyn á að hreinsa rækilega til í innyflum félagsmanna í Vekalýðsfélaginu Framsýn ætti hann að sjálfsögðu að sýna gott fordæmi og taka sjálfur að sér, á skrifstofu félagsins, að pumpa volga vatninu og glussanum í verkalýðsstéttina. Það myndi spara verkalýðsfélaginu háar upphæðir í péníngum og jafnvel skapa nokkur störf skrifstofunni með tíð og tíma, ef vel tekst til. En að fara að moka milljónum á milljónir ofan í Jónínu Ben fyrir eitthvert skítabras er gjörsamlega gaga og gúgú.  

Niðurgreiðir Detox meðferð

Gunnar borgarstjóri veit sem er

Auðvitað óttast hinn voldugi borgarstjóri Kópavogs ekki fáeinar blauðar lyddur úr feyskum hænsnakofa Framsóknarmaddömunnar. Gunnar I. Birgisson er svo mikill maður að á hann bíta engin vopn, allrasíst brotnar ryðbreddur í höndum loppinna framsóknarkotkarla. Og Gunnar borgarstjóri veit sem er, að ekkert er saknæmt við að dóttir hans taki að sér störf fyrir Kópavogsborg - það hefur nefnilega ekki verið talið til afbrota hingað til að vinna fyrir sveitarfélög - þar af leiðandi mun hann eiga allskostar við andskota sína nú sem fyrr. Í Kópavogi er einfaldlega ekki pláss fyrir pólitískan skítaskap, svo er Gunnari I. Birgissyni borgarstjóra fyrir að þakka. 

Óttast ekki meirihlutaslit

Landeyðan sem pissaði í buxurnar og skreið á fjórum fótum

Fyrr snarast jarðarkringlan út af sporbraut sinni en að framsóknargufurnar í Kópavogi þori að slíta meirihlutasamstarfinu við Gunnar I. borgarstjóra Kópavogs. Ef svo ólánlega vildi til að framsóknargreyin slysuðust til að ýja að meirihlutaslitum í viðurvist borgarstjórns fengju þeir slíka yfirhalningu að þeir hefðu ekki hugmynd um á hvorum endanum þeir ættu að standa á eftir. Þessháttar kom fyrir landeyðu nokkra sem hugðist stinga húsbónda sinn í bakið með bandprjóni af því hann hafði húsbóndann grunaðann um að halda við kvenmann sem landeyðan hafði augastað á. Um leið og landeyðan ætlaði að hefja prjóninn á loft sneri húsbóndinn sér við og gaf landeyðunni svo vel útilátinn löðrung að hann pissaði í buxurnar og skreið á fjórum fótum í viku á eftir.

Ræddu hugsanleg meirihlutaslit