Jóhannes Ragnarsson

2.10.2011 | 10:51

Efnilegur einkavæðingarvargur hefur sig til flugs

Nei, sko Steingrím litla, nú hann er bara að komast á gott skrið í einkvæðingunni; bráðum verður hann orðinn eins og stóru strákarnir, sem seldu Landsbankann og Búnaðarbankann á sínum tíma. Til hamingju Steingrímur minn. Ég skil nákvæmlega ekki neitt í hversvegna auðvaldsdýrin í Sjálfstæðis- og Framsóknarflokknum eru með óánægjugagg í garð Steingríms og Jóhönnu eftir allar þær gjafir sem þau hafa ausið yfir fjármagnseigendur, skjaldborgina sem þau reistu á erfiðum tímum, af mikilli óeigingirni, kringum auðvaldskerfið fyrir eigendur þess.

En sem betur fer er Steingrímur enginn veifiskati þegar kemur að alvöru íhaldsframsóknarkratapólitík. Stórhuga, sem fyrr, ætlar hann að verða mestur einkavæðingarvargur sem landið hefur alið, slá Davíð og Halldóri út í þeim efnum, sýna Hannesi Hólmsteini fram á, í eitt skipti fyrir öll, að einn framsóknarmaður úr Þistilfirði kann líka til verka þegar kemur að því að græða á daginn og grilla á kvöldin.