Ískyggileg flagðkona

Það virðist sem repúblíkanaflokkurinn í Bandaríkjunum hafi heldur betur keypt köttinn í sekknum með því að velja Söru, vinkonu okkar, Palin sem varaforsetaefni með karlskarfinum Jóni Makkein. Sara átti víst að vega upp meðalaldur forseta- og varaforsetaefna reppana og lappa uppá hina fögru ímynd repúblíkanakristindómsins og höfða til ungs fólks og kvenna. En nú er að koma í ljós, að undir sauðargæru vertíðarstúlkunnar Söru lifir og dafnar sitthvað ískyggilegt, gott ef ekki flagðkonulegt. Fyrir það fyrsta var karlinn hennar tekinn moldfullur á bíl fyrir 22 árum, sem bendir til að maðurinn sé slordóni og sluddmenni. Þá ku Sara sjálf vera grunuð um valdníðslu og spillingu, ennfremur að hafa stokkið frá nýfæddu barni sínu á þriðja degi til að framagosast, velta sér uppúr spillingarvilpunni og valdníða. Og til að kóróna ófögnuðinn, er 17 stelpugelgja, dóttir Söru, illa þunguð eftir rauðhærðan strákslána. Á dauð sínum áttu vammlausir repúblíkar fremur von en að Sara væri slíkt önglarassgat. En þeir vera að krafla sig framúr þessum ógöngum, einir og óstuddir og það vefst varla fyrir þeim frekar en innrásin í Írak.    

Uppljóstranir um Söruh Palin valda óróa

Gúmmísvunta með gati

Það er nú algjör óþarfi fyrir virðulega fanga á Litla-Hrauni að taka uppá að haga sér eins og ótíndir götustrákar rétt á meðan lærifaðir þeirra brá sér frá til að ljósrita fróðleik ofan í þá.  Látum vera þó illa uppaldir sparigrísir í háskólum landsins bregði á leik og hafi í frammi áflogatilburði við svipaðar aðstæður, en að ráðsettir nemendur við menntaskólann á Litla-Hrauni hagi sér með slíkum hætti er öldungis ótækt. En fyrst orðræðan á blogginu er farin að beinast að hrauni, í þessu tilfelli bara að litlu hrauni get ég ekki stillt mig um að láta eftirfarandi upphaf að ljóði eftir Magnús Þór Jónsson fylgja með:

Snorri huppur á Hrauninu

háttaði sig hjá kúnum

en hann skeit sig allan út í mykju

svo hann útvegaði sér gúmmísvuntu

með gati.

Pólstjörnufangar grunaðir um árás

Fylgi VG einkennilega lítið

Það góða við þessa skoðanakönnun er að fylgi Sjálfstæðisflokksins virðið vera að minnka, hægt og bítandi, þó svo að það sé með endemum að græðgisflokkur að þessu tagi njóti rúmlega 30% fylgis; ef allt væri með felldu væri Sjálfstæðisflokkurinn með fylgi uppá 7-10%, alls ekki meira. Það sem kemur helst á óvart við þessa skoðanakönnun er slakt gengi VG, en sá mikli vinstriflokkur mælist ekki með nema 19%, þrátt fyrir að vera í stjórnarandstöðu gagnvart sljórri og liðónýtri ríkisstjórn, sem hefur ekkert til málanna að leggja annað en niðurrifskennda og heimskulega frjálshyggjuóra. Við þessar aðstæður ætti VG að njóta fylgis þriðjungs kjósenda í skoðanakönnunum. Það fer ekki á milli mála, að andlit VG útávið, þingflokkurinn, þykir fráleitt trúverðugur, og skildi engan undra; fólk eins og Álfheiður Ingadóttir, Katrín Jakobsdóttir, Árni Þór Sigurðsson, Kolbrún Halldórsdóttir og Jón Bjarnason eiga ekkert erindi inn á Alþingi Íslendinga fyrir stjórnmálaflokk sem kallar sig Vinstrihreyfingu. Ef VG ætlar sér einhverja afgerandi hluti í framtíðinni verða flokksmenn að gjöra svo vel að opna á sér glyrnurnar og sópa ofangreindum íhaldsframsóknarröftum á sorphauginn sem geymir ónothæfa stjórnmálamenn og pólitíska loddara.   

Samfylkingin með mest fylgi

Aðilar og efnislaus hús.

Þó það nú, að störnusýslumaðurinn Stones láti fólk í sínu umdæmi komast upp með að stunda eiturnautn og hafa í fórum sínum óþrifnað sem gerir hvern mann vitlausan. Og alltaf er jafn gaman að lesa um þess svokölluðu ,,aðila" ekki síst þegar þeir eru í þokkabót þekktir hjá lögreglunni og eru grunaðir um að í húsum þeirra væru ,,efni." En svona okkar á milli sagt, þá hef ég aldrei heyrt talað um hús sem væru alveg laus við að vera úr einhverju ,,efni."

Húsleit í Hveragerði og Selfossi