Jóhannes Ragnarsson

13.2.2010 | 15:56

Sjáum nú til ...

Óskaplega er það sárt fyrir frjáls og friðelskandi stjórnvöld á Vesturlöndum þegar vel þjálfaðir stríðsdrengir þeirra, sem sendir hafa verið í aðrar heimsálfur til að kenna skrælingjum siðmenningu, eru skotnir eins og hundar eða sprengdir í loft upp af heiðnum villimönnum.

Nú hafa Talíbanar, sem eru einir sérdeilis hundheiðnir grimmdarseggir, drepið fimm hrausta og kristna pilta úr herliði NATÓ, samkvæmt frétt mbl.is. Ef ég þekki Talíbana rétt, þá hafa þeir veist að hinum snyrtilegu æskumönnum frá Vesturlöndum úr launsátri og unnið á þeim með bjúgsverðum, að hætti Múhámeðs villuspámanns.

Auðvitað verða Íslendingar að bregðast við þessum voðalegu tíðindum á mannsæmandi hátt. Ég trúi því að herra utanríkisráðherra Íslands sendi þegar í stað fjölmennt lið austur í Afganistan til að hjálpa hinum hraustu og hjartahreinu NATÓ-liðum í baráttu þeirra við ómennska og blóðþyrsta Talíbana. Þegar býður þjóðarsómi, þá á Ísland eina sál ...

Það væri ósköp upplífgandi á þessum myrku tímum íslandssögunnar, sem vér nú lifum, ef stjórnvöld sendu þó ekki væri nema fimmþúsund Íslands hraustustu syni þangað austureftir til að berjast fyrir vestrænum friði og frelsi. Og mikið myndi það ylja okkur Íslendingum að fá fréttir af afrekum okkar drengja í Afganistan undir fyrirsögnum eins og þessari: Íslenskir víkingar felldu tvöhundruð Talíbana síðastliðna nótt hörðum í bardaga í Helmand dalnum. Aðeins tólf Íslendingar létu lífið í aðgerðinni.