Heilagt systralag í mót Gnarrinu

Jón Gnarr er mikið og gott efni í fyrirmyndarborgarstjóra, um það þarf vart að deila. Það eru helst afdankaðir skítakarakterar með nautsvit og eitt og annað súrt og myglað í pokahorninu sem reyna af pólitísku fúllyndi að hafa horn í síðu Jóns borgarstjóra, en ávallt með svo óbjörgulegum hætti að þeir verða sér undantekningarlaust til háðungar og skammar.

Þó held ég að Sóley Tomm-fílí-romm-bomm-bomm og Hanna Birna hafi slegið mörg met í pólitískum fábjánahætti þegar þær sórust í heilagt systralag í dag á móti Jóni Gnarr og meintum dónaskap hans. Tilefni hins heilaga systralags var viðtal einhverra franskra blaðamanna við Jón Gnarr þar sem fram kom að hann notaði netið aðallega til að skoða klámsíður. Nú getur það svo sem verið umdeilanlegt hvort netklám sé einstaklingum uppbyggilegt eða ekki, en úrþví að fransmenn spurðu borgarstjóra Reykjavíkur á annað borð þeirrar mikilvægu spurningar: hvað skoðið þér mest á netinu herra borgarstjóri? varð borgarstjórinn auðvitað að velja á milli þess að segja satt eða ljúga. Ég þekki ekki annað en Jón Gnarr sé afar sannsögull maður, sem veit sem er að ein saklaus lygi getur leitt mann útí þá ófæru þaðan sem engin leið er til baka. Þessvegna sagði Jón Gnarr borgarstjóri frönsku blaðamönnunum allt að létta varðandi umgengni sína við internetið; sagði bara satt. 

En hið heilaga systralag Hönnu Birnu og frú Tomm kann ekki að meta sannleikann káfi hann of mikið uppá þeirra borgaralega snobbharðlífi - sem leiðir hugann að því hvort systralagið sé ekki umfram allt grundvallað á skinhelgi en ekki heilagleika sem kemur fram í fögru fordæmi. 

Ætlar aldrei aftur til Brussel

Athugasemdir

[Ingibjörg Guðrún Magnúsdóttir, 8.9.2010 kl. 23:57]

Hann er fyrirmynd mjög margra barna í dag vegna þess að hann Borgarstjórinn sá til þess að frítt komast þau í sund. Sem fyrirmynd og það að sú alvaralega staða sem búinn að vera uppi varðandi netið og auðfengið klám fyrir börn þar, þá já átti hann að vita betur en svo að svara svona..

[Eðvarð Hlynur Sveinbjörnsson, 9.9.2010 kl. 08:00]

Mikið er þetta þreytt of ofnotað, "hann er fyrirmynd fjölda barna". Í alvöru talað setja nýja plötu á fóninn.

[Eðvarð Hlynur Sveinbjörnsson, 9.9.2010 kl. 08:00]

og ofnotað átti það að vera.

[Jón Snæbjörnsson, 9.9.2010 kl. 08:20]

Gnarrinn má passa sig að tapa sér ekki alveg - það sem honum kanski leifist hér er ekki viðurkennt víðast annarstaðar - óþarfi að haga sér eins og einhver "Silvía" eða hvað hún hét þessi eurovision "mær"

[Eyjólfur Jónsson, 9.9.2010 kl. 20:18]

Jón Gnarr er alveg frábær sem uppvöknunarsprauta á þessa "gömlu" pólitíkusa og gerir kannski mest gagn á þeim vettvangi!

[Anna Sigríður Guðmundsdóttir, 10.9.2010 kl. 00:27]

það fattaði enginn af þessum "siðmenntuðu" í borgarstjórn að hann var að gera grín að svo fáránlegri spurningu sem hann fékk hjá þessum ágætu Fransmönnum!

Og heims-vefurinn sá sér ekki annað fært en að taka svarið úr samhengi til að bjarga snobbaða alheims-aðalnum!

Megi þeir bara blessunarlega fara í smá naflaskoðun, sem ekki hafa merkilegri spurningu fyrir Jón Gnarr en að spyrja hvað hann væri að skoða á netinu!!!

þarna grófu þeir sína eigin gröf í skilningsleysi á hvernig Jón Gnarr afgreiddi fordóma-fulla spyrjendur!

það er heimsþekkt að snobbaðir fyrirmenn eru siðlausastir allra þegar kemur að innsta kjarnanum!

Alltaf vex Jón Gnarr í áliti hjá mér! Og að sama marki minkar Sóley Tómasdóttir í áliti hjá mér, því hún skilur ekki raunverulega húmorinn og raunverulega lífið!

Hanna Birna þarf að passa sig á að lenda ekki í slæmum félags-skap?  M.b.kv.