Þau verstu naut af öllum vondum nautum

Alveg frá því ég fór að muna eftir mér hefi ég haft óstjórnlega illan bifur á nautum. Þetta eru illa innrættar skepnur, skuggalegar til augnanna og reka upp hljóð sem eru þessháttar að maður fær á tilfinninguna að þau komi langt neðan úr jörðinni. En þótt naut með horn og hala séu vond og vitlaus eru samt auðvaldsnautin verst, því fyrir utan að stefna að því að drepa saklausan múginn með arðráni og þrældómi alla daga vikunnar, hyllast þessi ótérlegu kvikindi til að hella kreppum og efnahagshruni yfir þjóðirnar þegar minnst varir eða heimstyrjöldum.

Einhverju sinni kom eitt af þessum frávita auðvaldsnautum á sveitabæ nokkurn á Norðurlandi og hafði með sér einkabílstjóra og tvær drukknar kvengæsir. Ekki var auðvaldstuddi þessi fyrr kominn inn fyrir þröskuldinn á bænum en hann tók til við að elta húsfreyjuna á röndum um allt hús með það að markmiði að komast undir pils hennar, meðan gæsirnar og einkabílstjórinn fóru að reyna að fleka bóndann með fagurgala og nærgöngulum strokum hér og hvar um skrokkinn. Því miður brast bóndanum sú kristilega siðferðisvitund sem honum hafði ungum verið innrætt og var orðinn buxnalaus þegar húsfreyjan kom að honum í hræðilegum stellingum með gæsunum og einkabílstjóranum. Aðvitað skakkaði hin fróma frú leikinn, rak kvenmannstuðrurnar út og einkabílstjórann og bað þau aldrei þrífast og sneri sér síðan að bónda sínum og klæddi hann aftur í buxurnar. En auðvaldsnautið sást aldrei meir. Hvað af því gerpi varð veit enginn enn þann dag í dag, en sagt er að næstu daga þar á eftir hafi hin vaska húsfreyja gert venju fremur vel við hænsnin í mat og hænurnar hafi þakkað fyrir sig með því að verpa hver um sig tveimur eggjum á dag. 

Beið bana eftir árás nauts

Athugasemdir

[Eyjólfur Jónsson, 16.11.2010 kl. 13:33]

Sæll Jóhannes minn. Mikið á ég nú orðið erfitt með að trúa þessum sögum þínum og þá sérstaklega þessa með auðvaldsnautið því að hænur verpa bara ekki 2 eggjum og það er staðreynd vinur minn.

[Jóhannes Ragnarsson, 19.11.2010 kl. 20:03]

Þú ert þó ekki að væna mig um ósannsögli, Eyjólfur? Mín einkunnarorð hafa alltaf verið: ,,sannleikurinn er sagna bestur."

[Eyjólfur Jónsson, 22.11.2010 kl. 20:58]

Satt segirðu Jóhannes minn! Þetta sagði Össur líka um um útkomu kosninganna