Þeir ætla ekki að láta sér segjast

Því miður eru engin merki uppi um að hinir svokölluðu ,,listamenn" séu að komast til ráðs og rænu, um það vitnar þessi ,,opni dagur" í ,,Listaháskóla Íslands" rækilega. Þessi grátlega staðreynd er því raunarlegri, að ekki eru nema liðnar nokkrar vikur frá því að ,,listamönnum" var ráðlagt að hætta öllu bulli og fara vinna heiðarlega vinnu eins og annað fólk í stað þess að vera einlægt á snöpum eftir peningalegum styrkjum frá hinu opinbera. Það mun öllum málum sannara, að styrkjasníkjandi listmenni væru betur komin við nauðsynleg störf í grútarbræðslum LÍÚ greifanna og í kerskálum álfíklanna en að lifa endalausu betlilífi og gera kröfur um að vera haldið uppi á skattfé almennings fyrir að klína málningarklessum á striga eða reka upp nágaul og önnur öskur og hávaða undir því yfirskyni að vikomandi hljóð sé tónlist. Nei, þessum hundakúnstum verður að linna, ríkissjóður verður að fá að vera í friði fyrir fólki sem stundar klessuverk og hljóðmengun en nennir ekki að vinna fyrir sér eins og heiðarlegt fólk - í Sjálfstæðisflokknum.  

Kynntu starfsemi Listaháskólans

Athugasemdir

[Garún, 15.11.2010 kl. 23:53]

Mikið rosalega ertu neikvæður og þröngsýnn maður ef að þetta eru skoðanir þínar um listamenn og list, ég veit ekki betur en að listamennirnir okkar hafi byggt upp ímynd Íslands á heimsvísu á meðan stjórnmálamenn hafi svert nafn okkar sem aldrei fyrr og einmitt fyrir þeirra eigin hagsmuni. List hefur glatt og hjálpað mannkyninu í fleiri þúsundir ára og er sköpun eitt af grundvallaratriðum í eðli mannins og menningunar eins og hún leggur sig. Sá sem afneitar list virðist ekki skilja hana eða nennir ekki að skilja hana og oft þegar fólk skilur ekki það sem það sér verður það reitt, sumir samt halda áfram að þroskast og líta sér nær, læra og lifa eftir því. Svo er líka til fólk sem heldur í gremju til listamanna vegna þess að það þorir ekki að skapa eða öllu fremur getur það ekki. Kjarval og Laxness myndu snúa sér við í gröfinni ef að þeir myndu lesa það sem þú ert að skrifa og heyra þau ummæli sem sjálfstæðisflokkurinn hefur látið falla um listamenn. 

Bestu kveðjur og með von um listrænan bata

[Jóhannes Ragnarsson, 19.11.2010 kl. 19:55]

Það vill svo skemmtilega til, Garún, að ég er algjörlega sammála flestu ef ekki öllu sem fram kemur í athugasemdinni þinni. Þær skoðanir sem fram koma í pistlinum mínum eru ekki mínar skoðanir heldur skoðanir sem ég heyrt fjölmarga ,,sjálfstæðismenn" viðra bæði fyrr og nú.

Þannig er nú það.