Hryllilegur sjúkdómur fær að grasséra í Kópavogi

Einelti er hryllilegur sjúkdómur sem getur lagst þungt á taugakerfi fólks og almenna heilastarfsemi. Þeir sem haldnir eru þessari veiki, að leggja aðra í einelti, eru gjarnan svo illa á sig komnir að þeir geta með engu móti samlagað sig heilbrigðu samskiptaformi mannlegs samfélags. Auk þess er eineltisveiki smitandi sjúkdómur og gegn henni duga engin apótekaralyf.

Gróft dæmi um hömlulausa eineltisveiki er framkoma Kópavogsbúa við sinn besta mann, Gunnar I. Birgisson, fyrrverandi borgarstjóra Kópavogs. Fyrst réðust Sjálfstæðismenn í Kópavogi gegn sínum manni, hröktu hann úr borgarstjóraembætti og vildu í kjölfarið ekki kjósa hann í fyrsta sæti framboðslista Sjálfstæðisflokksins. Þá tóku almennir kjósendur í Kópavogi við og felldu hinn farsæla meirihluta Framsóknaríhaldsins og leiddu til öndvegis einhverkonar afbrigði af úrkynjuðu Krataíhaldi. Og nú síðast berast fréttir af því að úrkynjaða Krataíhaldið hafi neitað Gunnari I. fyrrverandi borgarstjóra um aðstoð við gerð fjárhagsáætlunnar fyrir Kópavog. Það fylgir og hinni óhugnarlegu frétt, að Sjálfstæðismenn í bæjarstjórn Kópavogs styðji tiltæki úrkynjaða Krataíhaldsins gegn Gunnari I. með ráðum og dáð og neðanbeltisháðsglotti á vör. Einelti þessara andstyggilegu aðila er auðsjáanlega algjört og hömlulaust. 

„Valdníðsla af verstu sort“

Athugasemdir

[halkatla, 27.11.2010 kl. 12:41]

Vissir þú að Gunnar I Birgisson er leikari? Ekki ég heldur, fyrren í gær en þá sá ég hann í myndinni Citizen X. Hann lék öll gömlu kommúnistatröllin í nefndinni sem sá um að eyðileggja allt fyrir góða manninum. Hann þurfti ekki að breyta röddinni og undirhakan mikla var á sínum stað. Ég mæli með þessari mynd þó að morðinginn og fyrrnefnd tröll séu ógeðsleg.

[Jóhannes Ragnarsson, 27.11.2010 kl. 13:09]

Nei, ég vissi ekki að Gunnsi I. væri leikari, en sé hann leikari er hann áreiðanlega góður leikari; það leikur nefnilega allt í hönunum á þeim manni. Og ef hann er kommúnisti, geri ég ráð fyrir að hann sé steinsteypukommúnisti af bestu tegund.