Bölvuð læti útaf vinsamlegum ummælum.

Hvaða bölvuð læti læti eru þetta í frjálshyggjuunganaum Sigurði Kára Kristjánssyni yfir vinsamlegum ummælum Þráins Bertelssonar um þingmenn á feisbúkksíðu sinni ? Nú má vel vera að Sigurður Kári taki ummæli Þráins sérstaklega til sín, en það verður þá að skoða sem sálrænt einkamál þingmannsins. Það væri margfalt betur viðeigandi af Sigurði Kára, lærisveini fræðimannsins Hannesar Hólmsteins Gissurarsonar, að lýsa því yfir, að hann ætli sér í framtíðinni berjast af alefli gegn því að þingmenn hagi orðræðu sinni á þann hátt að hún gefi Þráni Bertelssyni tilefni til að kalla dagskrárliðina ,,Störf þingsins" og ,,Óundirbúnar fyrirspurnir" því leiðinlega nafni ,,Hálfvitar rífast."

Hinsvegar má kalla málflutning skaðbrenndra hrunsstráka og stelpna úr frjálshyggjubúri Sjálfstæðisflokksins ýmsum nöfnum, enda hefur sá kostulegi málflutningur á sér sterkan blæ afneitunar, forherðingar, vísvitandi gleymskuáráttu, óheiðarleika og siðblindu. Það er því vel skiljanlegt að Þráni Bertelssyni og eflaust fleiri þingmönnum þyki fremur raunarlegt að sitja undir miður gáfulegu gaggi frjálshyggjuhænsnanna, sem þjóðin var svo ólánssöm að kjósa til þingstarfa.  

Gagnrýnir ummæli Þráins á Facebook

Athugasemdir

[Vendetta, 19.1.2011 kl. 17:14]

Þótt ég sé lítt hrifinn af Þráni Bertelssyni flokkahleypi, þá finnst mér gagnrýni Sigurðar Kára hjákátleg og hallærisleg. En ég hef tekið eftir því að í sambandi við þessa frétt, þá eru flokkslínurnar greinilegar. Allir þeir sem skrifa færslu tengda fréttinni til varnar Sigurði Kára eru harðnaðir Íhaldsmenn. Þetta minnir dálítið á skipulagt upphlaup.

[Baldur Hermannsson, 19.1.2011 kl. 17:29]

Sigurður er óðum að breytast úr vatnsgreiddum Heimdellingi í alvöru stjórnmálamann sem mark er á takandi. Það er stórgaman að sjá hvernig hann flær lifandi hið hokna gerpi Vinstri grænna sem Framsóknarmenn komu á spenann fyrir margt löngu.

[Jóhannes Ragnarsson, 19.1.2011 kl. 17:39]

Uss-suss-sussu, Baldur. Okkur Ólsurum er ekki skemmt þegar við heyrum af afrekum Sigga Kára í pólitíkinni.

[Baldur Hermannsson, 19.1.2011 kl. 17:46]

Þið eigið að fylkja liði um sveininn og efla hann til afreka, þetta er ykkar maður.