Hér þarf nefnd geðlækna og sálfræðinga, ásamt stólpípu- og mykjulæknum.

Mikið ofboðslega er Samfylkingin furðulega afkáraleg í smekkleysi sínu: Boðar námskeið í skýrslu Rannsóknarnefndar Alþingis og fær Jón Baldvin til að vera leiðbeinanda! Hverskonar rugludallar eru þetta eiginlega? Það dugar ekkert minna en nefnd geðlækna og sálfræðinga, að viðbættum stólpípu- og mykjulæknum, til skoða innyflaflækjuna milli eyrnanna á svona gersemum.

Það væri mun betur viðeigandi að gerð verði rannsóknarskýrsla um Jón Baldvin og Samfylkingin héldi námskeið um þá skýrslu. Eða eru samfylkingarblesar máske búnir að gleyma, að það var Jón Baldvin sem lyfti Davíð Oddssyni uppí stól forsætisráðherra og við tók óslitin 18 ára slímuseta Sjálfstæðisflokksins í Stjórnarráðinu? Er gjörsamlega horfið úr minni sömu blesa, að Jón Baldvin var helsti baráttumaðurinn fyrir EES samningnum, sem lagði grunninn að Hruninu Mikla? Gera þessi grey sér virkilega enga grein fyrir að margnefndur Jón Baldvin er einhver mesti skrípalingur og ódráttur íslenskra stjórnmála til fjögurra áratuga?

Það er óhrekjandi staðreynd að það voru kratarnir í Alþýðuflokknum sáluga, sem hófu hrunadansinn og það voru sömu kratar, þá farnir að heita Samfylking, sem lauk hrunadansinum með eftirminnilegum bravúr, þegar dansararnir hrukku í einni skítabendu fyrir nábjörg kapítalismans, frjálshyggjunnar og EES.

Svo telja apparöt eins og Jón Baldvin, Jóhanna Sig. og Össur Skarhéðinsson, ásamt sínum líkum, sig vera þess umkomin að leiða þjóðina úr þeim ógöngum sem þau áttu drjúgan þátt í að koma henni í. Þetta lið er meira að segja svo staffírugt, að halda því fram að það sé að þrífa upp skítinn eftir Íhaldið og Framsókn! Þessháttar yfirlýsing hljómar í svipuðum dúr og að fjósamaður tæki sig til og færi að moka mykjunni úr haughúsinu til baka inní fjósið og kallaði það að þrífa flórinn! 

Námskeið um Rannsóknarskýrsluna

Athugasemdir

[Ásthildur Cesil Þórðardóttir, 5.12.2011 kl. 22:26]

Algjörlega sammála þér Jóhannes.

[Anna Sigríður Guðmundsdóttir, 5.12.2011 kl. 23:34]

Jóhannes. Takk fyrir þennan pistil. Ég þurfti svo sannarlega á því að halda að hlægja dálítið, og það gerði ég þegar ég las þennan pistil þinn.  

Það er alltaf einhver hæðni-húmors-púki í mér, sem ég get ekki kveðið alveg niður.

"Lýðræðissinninn" Jón Baldvin ætlar að halda framhaldskóla-námskeið fyrir Samfylkingar-grunnskóla-heilaþvegna innan Samfylkingarinnar. Lokaður hópur eins og hjá Frímúrarareglunni!

Þar af leiðandi er þetta námskeið ómögulega opið almenningi á Íslandinu, þar sem hjörð Jóns Baldvins á að læra allt um opið og réttlátt lýðræði, af mikilli lærdómsgáfu og námshæfni og samviskusamlegri og "kauplausri sjálfboðastarfs-vinnusemi"???

Til hamingju Jón Baldvin, með mestu hirðfífls-stöðu sem hingað til hefur fundið sér stað á Íslenskri grund.

Ég bið alla góða vætti að hjálpa Samfylkingarliðinu í heild sinni, ásamt restinni að landshjörðinni sundruðu og villu-trúgjörnu, því ég vil engum neitt illt.

M.b.kv.

[Gunnar Th. Gunnarsson, 6.12.2011 kl. 00:29]

Nú verðið þið í VG að bæta um betur og fá Svavar Gestsson til að halda námskeið um Icesave samningana

[Ásthildur Cesil Þórðardóttir, 6.12.2011 kl. 08:51]

Hahahaha Gunnar góður

Og Álfheiði tl að halda námskeið í almennri kurteisi og hirðsiðum. 

[Jóhannes Ragnarsson, 6.12.2011 kl. 09:39]

Ja, nú er ég ekki í VG lengur, en það kæmi mér svo sem ekki mikið á óvart þó Svavar héldi námskeið um Icesave innan þeirra vébanda og Álfheiður námskeið í kusteisi, mannsiðum og hirðsiðum.

[Ásthildur Cesil Þórðardóttir, 6.12.2011 kl. 21:24]

Jamm lengi getur vont versnað.