Skoðun frú Ingveldar og Máríu Borgargagns á aðhaldsfötum

Já, heiðurskonurnar, frú Ingveldur og Máría blessunin Borgargagn, hafa undanfarið beint sjónum sínum að aðhaldsfötum, sem er frekar undarlegt þar eð þær eru fremur lítið fyrir aðhald almennt, sérstaklega á vissum sviðum. Því miður eru þær stöllur absalútt andsnúnar svona ,,aðhaldslörfum" eins og þær kalla það, og telja konum best borgið að fara aldrei í þessháttar flíkur. - Það eru engin andskotans rétt undirföt til, er haft orðrétt eftir frú Ingveldi. Og hún bætir um betur með því að segja, að Naomi Watts sé hallærisleg kerlingarugla, sem ætti best heima í kolanámu innanum sveitta og skítuga djöflamergi.

Í dag frétti ég svo af því, að Máría Borgargagn hefði fyrir fám dögum dottið kylliflöt afturfyrir sig í verslun Nóatúns í Hamraborg þegar hún gekk full rösklega á vöruhillu. Við fallið flettust klæðin uppum hana, bæði að ofanverðu og neðanverðu, svo við blasti hverjum manni hve frjálslega hún var til fara innanklæða. Síðar, þann sama dag, lenti Borgargagninu og frú Ingveldi ila saman á kaffihúsi, þegar Máría var að segja vinkonu sinni frá óhappinu í Nóatúni, en þá hrökk uppúr frú Ingveldi, að sér kæmi þetta ekki á óvart vegna þess, að Indriði Handreður, sambýlingur Borgargagnsins, væri ljótur og luralegur og bráðum ónothæfur náttúruleysingi og landeyða. Þegar þessi orð höfðu fallið, slógust frú Ingveldur og Máría Borgargagn þangað til lögreglan kom til skjalanna og skakkaði óeirðinar. Þegar þar var komið sögu, mátti ljóst vera, að nota ekki undirföt, allrasíst þau réttu, þrátt fyrir að aðhaldsföt séu þessa stundina aðalmálið í Hollywood.

Ekkert nema aðhaldsföt á rauða dreglinum