Brynjar og spurningastúlkan

Myndin með þessari frétt er hreint út sagt ofboðslega hrollvekjandi. Þar situr ekki minni skelmir en Bryjar Níelíus í hrúgu, svo skuggalegur á svipinn, að engu er líkara en hann sé í þann veginn að fara að snara jarðkringlunni útaf sporbaugnum kringum sólina. Og við hlið hans situr óspjölluð telpa á spurningastúlkualdri, svo teinrétt í baki að ætla má að hún hafi verið nýbúin að gleypa kústskaft þegar myndin var tekin.

Við nánari eftirgrenslan, skilst mér að Brynjar Níelíus og spurningastúlkan séu nýkjörnir alþingismenn, og þykir mér að nú sé loks stungin tólgin, þegar svonalagað er kosið á þing af almennum kjósendum. Þessi ósköp segja mér og mínum líkum, að þegar kjósendur eru orðnir svo galnir að þeir kasta atkvæðum sínum á apparöt af þessu kalíberi, sé sem betur fer skammt að bíða endalokanna.

Það er síðan kapítuli útaf fyrir sig, hversvegna í ósköpunum stjórnendur Alþingis láta þessi tvö sitja saman. En kanske hafa stjórnendurnir litið svo á, að það eigi saman sem saman á. Ég vona bara að þetta fari ekki eins og hjá Ólafi Kárasyni Ljósvíkingi og Jasínu Gottfreðlínu Jasonardóttur hér um árið.

- Það verður Hrun, meira segi ég ekki.

Jakkafötin voru keypt í neyð

Athugasemdir

[Gústaf Níelsson, 13.6.2013 kl. 00:29]

Þið kommúnistarnir eruð auðvitað felmtri slegnir yfir niðurstöðum lýðræðisins í frjálsum kosningum, einkum og sér í lagi ef niðurstaðan er ykkur ekki að skapi Jóhannes. Það er nú hálfgerð ónærgætni að segja stúlkukindina óspjallaða á fermingaraldri, þegar hún er greinilega kröftug, komin yfir tvítugt og ábyggilega heilmikið fyrir fyrir að gera hitt, ef að líkum lætur. Ekkert skil ég í því hvað karlgarmur eins og þú ert önugur út í hrausta kvenþjóðina. Látum nú vera þótt "skuggalegur skelmirinn" Brynjar Níelsson valdi þér andvöku, enda býst ég við því að hann taki því ekki fagnandi að vera kallaður "svonalagað" og "apparat af svona kalíberi", auk þess sem hann er enginn Ljósvíkingur. En virðing þín fyrir háttvirtum kjósanda er aðdáunarverð.

[Ásthildur Cesil Þórðardóttir, 13.6.2013 kl. 13:58]

Jamm Jóhannes minn,  ekki fallegt að skelma stúlkuna, þetta er örugglega afskaplega skelegg og dugleg stúlka eins og hún á kyn til, og á eftir að standa sig vel í þessu ábyrgðarmikla starfi, Reyndar ekki svo góð hugmynd að staðsetja hana við hliðina á öfgakjaftinum sem þarna situr.   

[Jóhannes Ragnarsson, 13.6.2013 kl. 22:50]

Þakka ykkur báðum, Gústaf og Ásthildur Cesil fyrir innlitið. Þetta er skemmtilegt.

Reyndar er ég, kommúnistinn, ekki felmtri sleginn yfir niðurstöðu síðustu kosninga, fjarri því. Að mínu mati var niðurstaða síðustu Alþingiskosningum rökrétt í ljósi þróunnar kapítalismans. Úrkynjun kapítalismans hefur aldrei í sögunni verið jafn ljós og sú þróun muna halda áfram af fullum krafti næstu árin, í þeim efnum verður ekki aftur snúið.

Og fall kapítalismans er óumflýjanlegt. Þetta ójafnaðar og rányrkjukerfi mun renna sitt skeið, spurningin er hvenær en ekki hvort það lognast útaf og deyr drottni sínum, Mammoni. Það má vera, að kapítalistunum takist með herkjum að teygja lopann í 100 ár í viðbót, kanske örlítið lengur, en þá mun sósíalismi af einhverju tagi ná yfirhöndinni í heiminum og fá að þróast og dafna í friði.