Hinar kjarkmiklu og vösku 13 ára stúlkur eiga öflugar frænkur að fyrirmynd

Þegar nánar var grenslast fyrir um hinar kjarkmiklu og vösku 13 ára stúlkur, sem óku bifhjólinu svo snilldarlega með lögregluna eins og andskotann á harðaspretti á eftir sér, kom í ljós, eins og mig grunaði, að þær eru náfrænkur frú Ingveldar og Máríu Borgargagns. Og ekki nóg með það: Heldur eru frú Ingveldur og Borgargagnið helstu fyrirmyndir stúlknanna, en þær bókstaflega dýrka hinar frægu frænkur sínar og hafa heitið því hátíðlega, að þær ætli sér í framtíðinni að verða nákvæmlega eins frú Ingveldur og Borgargagnið. Af því má ráða, að blessaðar telpurnar, 13 ára og bráðum spurningastúlkur, hafa sett sér háleitt markmið.

Þegar frú Ingveldur frétti af afreki hinna ungu bifhjólameistara, glaðnaði svo heldur betur yfir henni þrátt fyrir mánudagstimburmennina, að hún hringdi í leigubílstjóra og skipaði honum að fara í ríkið fyrir sig og kaupa 5 kassa af Carlsberg Elefanti og fimm pottflöskur af stalínískum vodka og færa sér undanbragðalaust á stundinni.

Þegar frú Ingveldur var búin að drekka úr sér timburmennina stefndi hún Máríu Borgargagni og stúlkunum á sinn fund. Þegar þessi pistill er ritaður, stendur gríðarleg veisla sem hæst hjá frú Ingveldi og ekkert til sparað í mat og drykk. Enda ekki á hverjum degi, að frædfólk frú Ingveldar og Máríuborgargagns vinna jafn stórbrotið afrek og bifhjólagelgjunnar unnu í gærkvöldi. Hitt er svo aftur annað mál, að helvítis ljósastaurinn sem telpurnar óku á hefði átt að vera staðsettur annarsstaðar, en sá staurfjandi kom í veg fyrir að þeim tækist að stinga lögregluna af.

Börn veittust að lögreglu

Athugasemdir

[maggi220 (IP-tala skráð) 24.6.2013 kl. 21:53]

Til hamingju, þú ert kominn í áróðursherferð gegn 13 ára stelpum, er hægt að leggjast lægra..?

[maggi220 (IP-tala skráð) 24.6.2013 kl. 21:53]

...

[Jóhannes Ragnarsson, 24.6.2013 kl. 22:05]

Takk fyrir maggi220.

En í hverju liggur þessi meinta áróðursherferð, er hún móti einhverju eða með einhverju?

[maggi220 (IP-tala skráð) 25.6.2013 kl. 23:35]

Ég var kanski ekki að ná einhverjum einkahúmor sem er í gangi hér, en þú áttar þig á því að það eru í gangi mjög skiptar skoðanir milli manna um hvort lögreglan hafi bara verið að verja sig í neyð frá stórhættulegum upprennandi glæpamönnum eða hvort það að neyða vespu útaf veginum fyrir svotil engar sakir þannig að lá við stórslysi sé eðlilegt. En ekki láta mig trufla þig, haltu bara áfram með sögurnar þínar..