Hvers eiga ekkiskáldin Sjón og Yrsa að gjalda?

Hvernig í andskotanum stendur á því að síðhipparnir Auður Jónsdóttir og Eiríkur Örn eru tilnefnd til Bókmenntaverðlauna Norðurlandaráðs? Hvurslags eiginlega smekkleysa er þetta?

Til Bókmenntaverðlauna Norðurlandaráðs á að tilnefna ekki skáld á borð við Sjón, Yrsu reyfarahöfund og Hallgrím Helgason, svo einhverjir séu nefndir. Til dæmis er Sjón svo mikið ekkiskáld, að hann gjörsamlega óskiljanlegur í innihaldslausri fávísi sinni. Þá er Yrsa glæsilegur fulltrúi hinnar úrkynjuðu auðvaldsgreinar bókmenntanna, glæpareyfaranum. Um Hallgrím Helgason þarf ekki að fjölyrða, hans list reis hæst þegar hann hékk eins og sæsteinsuga á rúðunni á bifreið Gjeirs Haarde hér um árið.

En að tilnefna fyrrgreinda síðhippa til virðulegra verðlauna Norðurlandaráðs er ámóta gáfulegt og viðeigandi eins og Íslendingar hefðu tilnefnt G. Grímsson Grunnvíking og Jón Grindvicensis til sömu verðlauna. Eina bótin í þessu hörmulega máli öllu, er að ólánsskepnunum, sem sjá um tilnenfningar til Bókmenntaverðlauna Norðurlandaráðs, skuli ekki hafa hugkvæmst að tilnefna aðra eins erkiþrjóta og kommúnista og Guðberg Bergsson, besta vin fémínísta í Grindavík, og Einar Má Guðmundsson.

En hvað um það, í dag eru allir sannir bókmenntaunnendur sárgramir og hneykslaðir á óskiljanlegu síðhippadekri þeirra ábyrgðarlausu manna, sem gerðu sér lítið fyrir og komu Auði Jónsdóttur og Eiríki Erni á framfæri þeirra sem úthluta bókmenntaverðlaunum í heimshluta bláeygðra víkinga.

Auður og Eiríkur tilnefnd