Bæði með buxurnar á hælunum

Það má heita densilegur andskoti, að gera sér að leik að etja saman, fyrir framan alþjóð, tveimur pólitískum stórsyndurum með brækurnar á hælunum. Auðvitað er svonalagað stórhlægilegt og lítt til þess fallið, að auka virðingu kjósenda við alþingi og ríkisstjórn. Eftir að hafa setið aðgerðalaus og undigefin við ódáminn Steingrím í ríkisstjórn í fjögur ár, er Katrín ekkipólitíkus ómarktæk í hverju einu sem lýtur að stjórnmálum. Um Bjarna þarf ekki að fjölyrða, hans pólitík tilheyrir úrkynjaðri og óforskammaðri stjónmálastefnu, sem ber í sér hrun og spillingu í hverju spori.

En þetta er allt gott og blessað, og ef fólki þykir gaman að innantómu blaðri tveggja afdankaðra stjórnmálalarfa er það því ekki ofgott. Hitt er þó öllu gleðilegra, að frú Ingveldur og Máría Borgargagn hafa notið dagsins í dag með því að rétta sig af á jólaglöggi, sem Kolbeinn gerði sterkara og bragðbetra með brennsluspritti. Og þeirra á milli er ekki töluð vitleysan, ólíkt því sem er þegar Katrín Álfheiðar og Steingrímsdóttir J. og Bjarni karlinn Ben ræðast við.

Þegar Jón bóndi Hreggviðsson að Reyn mælti þau orð, að allir hundar gerðu sér að leik að míga utaní Sigurð Snorrason böðul, má segja að hann hafi spáð því sama um stjórnmálamenn á fyrrihluta tuttugustu aldar. Það er nefnilega ekki nóg með að stjórnmálaforingjar dagsins í dag eigi það sameiginlegt að vera með buxurnar á hælunum alla daga, heldur leggja hundar, allt niðrí litla hvolpa, lykkju á leið sína til að kasta af sér vatni utaní bera spóaleggina á þessum guðsvoluðu ,,foringjum."

Heilbrigðiskerfið fram yfir þróunaraðstoð

Athugasemdir

[Ragnar Gunnlaugsson, 8.12.2013 kl. 17:49]

Það er ekki að þér að spyrja Jóhannes,málefnalegur og hófværðin skín af skrifum þínum.

[Jóhannes Ragnarsson, 8.12.2013 kl. 17:59]

Já, Ragnar minn, það er ófrávíkjanlegt prinsipp hjá mér að vera málefnalegur og hógvær í öllum mínum skrifum. Ég þykist vita að þjóðin kunni að meta að eiga svona grandvaran mann á blogginu.