Gleðiefni fyrir kjósendur í Reykjavík

Það er stórmerkilegt, að langbesti borgarfulltrúi VG frá upphafi, Þorleifur Gunnlaugsson, skuli hafi verið hrakinn úr flokknum fyrir engar sakir aðrar en þær að hafa starfað nákvæmlega í þeim anda sem ætlast var til af kjörnum fulltrúum hans þegar flokkurinn var stofnaður.

En það hefur margt breyst síðan "Vinstrihreyfingin grænt framboð" var sett á laggirnar. Ekki liðu mörg misseri þar til þessi efnilegi flokkur var með húð og hári kominn í klærnar á þeim er síst skyldi, þ.e. valdasjúkum tækifærissinnum sem munaði ekki um að selja flokkinn andstæðingum hans á spottprís fyrir nokkra ráðherrastóla. Sú sorgarsaga er flestum kunn og þarf því varla að rekja hana frekar.

Það ætti að vera kjósendum í Reykjavík gleðiefni, að Þorleifur skuli gefa kost á sér í borgarstjórnarkosningunum í vor, því framboði hans er skýrt mótvægi gegn þeirri hægri sinnuðu og tiltölulega einlitu hjörð spjátrunga í gáfumannaleik sem hinir flokkarnir bjóða uppá.

Þorleifur mun leiða Dögun í borginni

Athugasemdir

[Árni Gunnarsson, 28.2.2014 kl. 11:08]

Þessi maður hefur lagt vinnu að málefnum eldri borgara. Það finnst mér mikill kostur og það má mikið vera ef ég tel önnur framboð betri í vor.

Það er mikið talað um málefni okkar, elda fólks og margur frambjóðandinn mun fá vitrun fljótlega og sumir fleiri en eina. 

Mín reynsla af vitrunum frambjóðenda í aðdraganda kosninga er fremur slæm. 

Og það er svo þröngt um fólk í húsnæði sem kemst ekki út úr umræðustigi innblásinna framboða. 

Húsnæðismála aldraðra á höfuðborgarsvæðinu hefur venjulega skírskotun í eina átt eða í mesta lagi tvær.

1. Hver á að græða á framkvæmdinni.

2. Þetta þarf að vera flott, rúmgott og rándýrt svo þokkalega efnað fólk þurfi ekki að búa í ellinni í nábýli við lágstéttarhyski. 

[Jóhannes Ragnarsson, 28.2.2014 kl. 11:16]

Ef ég væri kjósandi í Reykjavík myndi ég hiklaust kjósa listann hans Þorleifs og vonandi gera það sem flestir.