Allt er þetta í boði Steingríms J. og Flokkseigendafélags VG

Ekki var við öðru að búast en að misskipting héldi áfram undir ríkisstjórn höfuðauðvaldsflokkana í landinu; það þurfti ekki einusinni hina stórmerku stétt ,,stjórnmálafræðinga" til að segja okkur það. En þegar pólitískir ólánsgemlingar og afturúrsiglarar eins og Flokkseiseigendafélag VG (skammstafað: FVG) telur sig þess umkomið að hafa efni á hjali um aukna misskptingu er ekki laust við að manni þyki nokkuð rösklega stungin tólgin. En það verður víst að virða umræddu Flokkseigendafélagi til vorkunnar, að þar á bæ kann fólk ekki að iðrast og því síður að skammast sín, að maður tali nú ekki um að biðja fyrrverandi flokksmenn sína og kjósendur fyrirgefningar á fáheyrðum svikum, hroka og ómennsku. Og sannast þar hið fornkveðna, að af skepnuskapnum þekkjast skepnurnar best og að fyrr botnfrýs í helvíti en að ,,Vinstrihreyfingin" grænt framboð verði vinstriflokkur. Og svo er nú það ...

Staðreyndin er sem sé, þó óskemmtileg sé: að umrædd misskipting undir núverandi stjórn, er að öllu leyti í boði Steingríms J. og FVG. Steingrímur og Flokkseigendafélagið endurreisti nefnilega Gamla Ísland eftir Hrunið með fádæma svikun og auðvaldsþjónkun, að kjósendur sáu að við þvíklík firn mátti ekki standa og kusu erkiauðvaldsflokkana aftur til valda.

Það er hlálegra en frá þurfi að segja, að hinni hægrisinnuðu auðvaldsstjórn Steingríms og Jóhönnu munaði ekki um að brúka hótfyndnar nafngiftir á sjálfa sig eins og ,,Fyrsta hreina vinstristjórnin á Íslandi" og ,,Norræna velferðarstjórnin." Nær sanni hefði verið að þessir óforskömmuðu apakettir og aðdáendur ASG, LÍÚ, ESB og kvótakerfisins hefðu nefnt stjórn sína ,,Viðreisnarstjórn Gamla Íslnds" eða ,,Auðvaldinualltstjórnin."

Ríkisstjórnarstefnan stuðli að misskiptingu

Athugasemdir

[Kristján B Kristinsson (IP-tala skráð) 17.5.2014 kl. 07:55]

Góður pistill hjá þér JR sem endranær, gallin er bara sá að þorri vinstra fólks er annað hvort ekki vinstri sinnað eða það skortir eitthvað verulega á hæfni þess til að skilja það sem þú ert að lýsa, eða það einfaldlega vill ekki skilja það.

kv. KBK.

[Jóhannes Ragnarsson, 17.5.2014 kl. 10:38]

Þetta þrennt sem þú nefnir er að mínu mati allt rétt. Mikið af þessu fólki er ekki vinstrisinnað; er í mesta lagi vatnsblönduð undanrenna af gömlu sósíalistunum og verkalýðssinnunum.

Ég er samt alltaf jafn hissa á raunverulegu vinstrisinnunum sem bæði sjá og skilja, að hafa ekki náð að sameina sig gegn platvinstrisinnunum, flokkseiegndunum, tækifærissinnunum - já og sagt þeim stríð á hendur. Því miður húka menn vondaufir, hver í sínu horni, og bíða átekta, alveg eins og náungarnir sem biðu eftir Godot.

[Kristján B Kristinsson (IP-tala skráð) 17.5.2014 kl. 15:31]

Og ástandið hjá okkur er svona eins og það er að það eina sem aðgreinir flokkana er að þeir skilgreina hvorn annan sem andstæðing eða samherja og svo reyna þeir að fiska í sama pollinum, hafa í raun nánast engan málefnalegan aðskilnað og hafa þar af leiðandi engan bolta til að sparka í, þá er bara eftir að hjóla í andstæðinginn persónulega sem gert er óspart og skítnum kastað í djöfulmóð. þetta eru lobbyistar upp til hópa.   

[Kristján B Kristinsson (IP-tala skráð) 17.5.2014 kl. 15:34]

Því er kannski við að bæta að þau sárafáu sem reynt hafa að vera stefnu og sannfæringu trú þarna á Alþingi, þau hafa ekki riðið feitum hesti frá því og helst verið tækluð af samflokksfólki.

[Jóhannes Ragnarsson, 17.5.2014 kl. 17:05]

Í VG hefur Flokkseigendafélagið notað tveggja fóta tæklingar á alla þá sem þeim hefur fundist sér stafa ógn af frá vinstri; uppundir helmingur þingflokksins á síðasta kjörtímabili höltruðu óleikfærir af velli, fyrir nú utan alla hina.