Ekki á vetur setjandi

Ekki efa ég að frjálslyndi og gleði hafi ríkt í kerðsum auðvaldssinnuðu hugsjónaleysingjanna í 101 Reykjavík meðan alþýðan hefur mátt bjarga sér dag frá degi með því að lepja dauðann og djöfulinn úr skel. Dagur bé, gnörrin og hinir auðvaldbesefarnir borgarstjórn deila ekki kjörum með alþýðunni, vita ekki að hún sé til, og vilja heldur ekkert af henni vita. Þessir uppskafningar, tómhyggjubjálfar og laumuaðdáendur og vinir Péturs Þríhross og Jóhanns Bogesen skemmta sér við háfleygar diskúasjónir um skipulagsmál fyrir fáráðlinga, flugvöllinn burt, rauðvíssnobb undir harmónikkuleik Gvendar vitlausa og hlægja sig dauðmáttlausa af ekkibröndurum yfirgnarrsins og proppalingsins. Hugarheimur þessa afdankaða sjálfhverfa rumpulýðs markast af suðurenda Stóru Tjarnarinnar, Lækjargötu, Hafnarstræti og Suðurgötu. Um heiminn sem við tekur utan fyrrgreindra landamerkja varðar hann ekki um, og úthverfi borgarinnar þekkir þetta fólk ekki nema í mesta lagi af afspurn. Á sveitamáli væri sagt um þessar skepnur, að þær væru ekki á vetur setjandi.

Frjálslyndi og gleði í borginni

Athugasemdir

[Jón Valur Jensson, 26.5.2014 kl. 22:18]

Einmitt, ekki á einn einasta vetur setjandi! -- Og hér er mitt viðbragð:

jvj.blog.is/blog/jvj/entry/1391402/

[Kristján B Kristinsson (IP-tala skráð) 28.5.2014 kl. 07:55]

Góðir  pistlar hjá þér JR. sem endranær, en er ekki vandamálið að það eru ekki lengur neitt fólk með pólitíska sannfæringu eftir í bransanum, þetta eru allt saman atvinnupólitíkusar og lobbyistar og í raun leikarar sem ná að selja sig til að ná kjöri, er ekki Jón Gnarr gott dæmi um þetta? gerðist borgarstjóri til að fá þægilega vel borgaða innivinnu.

[Vésteinn Valgarðsson, 28.5.2014 kl. 12:24]

Jói, vandamál íslenskra stjórnmála hverfast um skiptingu í stéttir en ekki skiptingu í póstnúmer. Auðmenn og arðræningjar búa í flestum póstnúmerum, meðal annars á landsbyggðinni -- og alþýðan líka -- þannig að póstnúmerahreppapólitík veitir lítinn skilning á alvörumálum.

[Vésteinn Valgarðsson, 28.5.2014 kl. 12:25]

Viðbót: Og hvers eiga auðvaldssinnaðir hugsjónaleysingjar annarra póstnúmera að fara varhluta af gagnrýninni?

[Jóhannes Ragnarsson, 29.5.2014 kl. 21:10]

Mér hefur nú sýnst, Vésteinn, að áhugamál atvinnupólitíkusanna í borgarstjórn Reykjavíkur spanni ekki yfir ýkja stóran part af höfuðborginni, hvað þá að kjör og lífsbarátta alþýðunnar sé þessu lið hugleikin.

[Vésteinn Valgarðsson, 30.5.2014 kl. 14:34]

Með því að slengja sökinni á póstnúmerið (a) fyllist sakamannabekkurinn af saklausu fólki sem býr þar - á borð við sjálfan mig; (b) undanskilurðu alla arðræningja og tækifærissinna sem eru svo heppnir að búa í öðrum póstnúmerum og (c) tekurðu undir við/þeir skiptingu sem sveitastórbokkar nota til að setja sjálfa sig í hóp með alþýðu landsbyggðarinnar í staðinn fyrir að fólk skoði hlutina í stéttalegu samhengi. Það eru auðvaldið og taglhnýtingar þess sem verðskulda bomsuna í rassinn.

Auk þess er miðbær Reykjavíkur ekki bara eitthvert random póstnúmer, heldur er hann bæði sameign allra landsmanna og andlit landsins út á við.