Jóhannes Ragnarsson

2.9.2014 | 22:16

Gunnar Bragi og herdeild gifturíka kaupfélagsstjórans á leið út á vígvöllinn

Hann hefir löngum þótt vaskur maður og bardagafús hann Gunnar Bragi (þeir hjá NATO kalla piltinn Gunsjor Braggi) og gefinn fyrir stríðsæsingar og vopnaglamur. Nú sér hann loks tækifæri á, að láta svo um munar til sín taka á orustuvellinum, þegar farið verður að stríða við Pútín og hin rússnesku hálfmennin. Sagt er, að Gunnsjor Braggi hafi lofað herforingjum NATO, að senda herdeild gifturíka kaupfélagsstjórans á Sauðárkróki austur í Úkraníu með heykvíslar og fjósaskóflur úr vopnabúri gömlu Framsóknarmaddömunnar til að vinna á melrökkunum frá Moskvu. Og ef vel tekst til verður hin kná kempa og strengjabrúða kaupfélagsstjórans gerð að framkvæmdastjóra NATO, þegar hann verður búinn að reka fantinn Pútín í gegn með fjósaskóflunni.

Vert er þó að hafa áhyggjur af hrakandi heilsufari Framsóknarmaddömunnar, en hún hefur að mestu legið rúmföst hin síðari ár. Henni hefir aðeins tekist að ljúga sig á fætur annað slagið, en fallið jafnhraðan í ómeginn aftur með andarteppu og korri. Hafa líflæknar kerlingar upp á síðkastið haft á orði, að réttast væri að gefa henni náðarsprautuna, en sprautan sú ku innihalda vítissóda hrærðan út í salmíaksspíritusi.

Fyrir allskömmu síðan birtist hryllileg skoðannakönnun, sem dró Maddömuna hér um bil til dauða. Til að bregðast við aðsteðjandi þurrð á kjósendamarkaðnum, er nauðsynlegt að bestu menn Framsóknar fari út á vígvöllin til að berjast við andskotans Rússana og Múslimana svo að fylgið rjúki upp í hæstu hæðir.