Hin ógnarróttæka undanrennumenning á ,,vinstrivængnum"

Það var mikið að haldinn var aðalfundur í félagi ungs undanrennufénaðar og dekurdýra í VG. Aðalfundir þessa merka félags hafa ævinlega vakið mikla athygli og kátínu meðal þjóðarinnar, sem dáðst hefur að snerpu og ógurlegri róttækni undanrennuunganna. Því miður hafa þessir skemmtilegu fundir fallið niður hin síðari ár af annarlegum ástæðum, en eru nú afturgengnir eins og Þorgeirsboli forðum.

Auðvitað er hinn uppvakti undanrennufélagsskapur tussufínn og skæslegur í eymd sinni og tilbúinn að þjóna ekki ómerkari platvinstritólum en Steingrími okkar hérna joð, Álfheiði, Ögmundi og Svavarsfjölskyldunni. Það er því mikil ábyrgð, sem blessuð börnin eru að taka að sér undir menntuðum starfsheitum á borð við ,,aðalritari" ,,talskona" ,,viðburðastýra" ,,innrastarfsfulltrúi." Að vísu minna starfsheitin atarna dálítið á titla starfsfólks í bankaútibúum, en það gerir ekkert til þar eð krakkagreyin eru svo helvíti kapítalísk í hugsun, að hreilega rýkur úr tálknunum á þeim.

Og ekki lætur róttækni undanrennulýðsins og dekurdýrana að sér hæða: Það kemur semsé fram, að unga fólkið, sem fær náðarsamlegast að kíkja uppúr buxnastrengjum Steingríms og félaga, vill endilega reka Hönnu Birnu úr embætti og hefir um það ljótan munnsöfnum, sem ekki hæfir fólki sem ekki er vaxið uppúr leikskólaþroska; ennfremur skilur það ekkert í því að Flokkeigendaklíka VG skuli ekki hafa drullast til að taka afstöðu gegn olíuvinnslu. Afturámóti virðist þessi rassvasasöfnuður Flokkseigendaklíkunnar eiga við umfangsmikinn trúaráttunarvanda að stríða og á erfitt með að gera upp við sig hvort hann sé múhámeðstrúar eða lífskounarfélagstrúar og kenna vissum framsóknarkéllínum um þetta vandamál sitt.

Nú er bara að bíða og sjá hvort undanrennuliðarnir fylgja hinni ógnarharðskeyttu róttækni eftir með því að boða sósíalisma, stéttarbaráttu og þjóðfrelsi, þjóðnýtingu framleiðslufyrirtækja, banka og tryggingafélaga, að ógleymdu afnámi kvótakerfis til lands og sjávar, einbeittrar andstöðu við inngöngu Íslands að auðvaldsbákninu ESB og úrsögn landsins úr NATO.

Ný stjórn ungra Vinstri grænna