Þá mun fjúka í öll skjól fyrir betri borgara

Síðan á mánudaginn var hefir ríkt þungt og þrúgandi andrúmsloft á heimili frú Ingveldar og Kolbeins Kolbeinssonar skrifstofustjóra og framsóknarmanns. Ekki hefir vantað að gestkvæmt væri á heimili hjónanna síðastliðna tvo sólarhringa; menn og konur hafa komið og farið, þung á brún eins og einhver í vinahópnum hafi verið myrtur á svívirðilegan hátt. Ástæðurnar fyrir þessum skyndilega alvarleika og sorgaryfirbragði er einkum tværi: 1. Ógurlegur fjöldi fólks, sem mætti síðdegis á mánudaginn niður á Austurvöll til að mótmæla ríkisstjórn frú Ingveldar, Kolbeins og þeirra vina. 2. Ósvífin árás lögreglu og ríkissaksóknara á valinkunna sómamenn, sem þessir tveir aðiljar voga sér að ásaka um að hafa átt mök við vændiskonur.

Í morgun mætti Kolbeinn til vinnu með greinileg ummerki eftir snarpar blóðnasir, en þær hafði hlotið þegar frú Ingveldur rak honum einn salígramm á nasirnar um leið og hún sagði honum, að honum hefði verðið andskotans nær að láta þar vera að skjögra útúrfullur á hóruhús og láta löggudjöfulinn nappa sig og þurfa svo að mæta fyrir rétt og láta hyskið þar hlægja að sér og borga svo fúlgu fjár fyrir uppátækið.

Sambýlifókið, Indriði Handreður og Máría Borgargagn, eru að vonum bæði óánægð og skelkuð eftir að hafa verið gripin, bæði tvö, í bólinu hjá hroðalegri, praktísérandi vændisdrós í Fannborginni. Þau telja, að háborgaralegt mannorð þeirra sé í stórhættu ef fjölmiðlar, t.d. Ríkisútvarpið, sem er ríkisrekinn kommúnistafjölmiðill, nafgreini þau og birti af þeim myndir útaf þessari djöfulsins uppákomu.

Og ef skrílnum, ruslatunnupakkinu og öfundsýkisdrullusokkunum, tekst með ofbeldi að hrekja ríkisstjórnina frá völdum, eru frú Ingveldur, Kolbeinn og þeirra fólk þess fullviss, að þá verði fokið í öll skjól fyrir betri borgara af þeirra kalíberi. 

Siggi hakkari sakhæfur en siðblindur

Athugasemdir

[Helgi Ingólfsson, 5.11.2014 kl. 20:28]

Býsna gott sem endranær, frændi, kjarnyrt og myndrænt. Ef til eru "betri borgarar", er þá skríllinn, ruslatunnupakkkið og öfundsýkisdrullusokkar "verri borgarar"? Hvernig getur maður bætt ráð sitt og orðið "betri" borgari?

[Jóhannes Ragnarsson, 5.11.2014 kl. 20:47]

Veit ekki, Helgi, hvernig hugsanlega er best að standa að því að bæta ráð sitt til þess arna; ég hef nefnilega aldrei fengið þá geðveilu í höfuðið að gerast ,,betri borgari."