Frjálshyggjubesefarnir og undanrennustóðið

Það er eitt af megineinkennum hugsjónalausa undanrennustóðsins, sem gerir kröfu til að vera álitið vinstrisinnað, að andskotast útí veslings þjóðkirkjuna eins og galnir frjálshyggjubesefa útí ríkisreknar stofnanir. Reyndar hefir hugsjónalausa undanrennustóðið verið býsna svag fyrir einkavæðingum, útvistunum og einkaframkvæmdum, svo mörkin milli þeirra og frjálshyggjubesefana hafa í reynd verið skemmtilega óljós og ólyktin af þessu öllu eftir því. Á meðan frjálshyggjudýrin vilja einkavæða skólana til hinnar extrasjálfumglöðu Margrétar Pálu, sem eitt sinn þóttist vera til vinstri eins og Líf, Sóley og Katrín Jakk þykjast vera, vilja undanrennuhænsnin í VG einkavæða þjóðkirkjuna.

Nú er það svo, að kynjaskepnurnar, sem gera VG út, réttlæta tilvist útgerðar sinnar með því að þær séu svo róttækar til vinstri og gríðarlegir umhverfissinnar, að þær geti ekki verið í öðrum pólitískum loddarasamtökum eins og til að mynda með Árna Páli, Gvendi Steingríms eða Birgittu Jónsdóttur Hirt. Hinsvegar er selskapur Lífar, Katrínar, Steingríms, Svavarslektisins og Ögmundar ekki róttækari til vinstri en svo, að hann vill umfram allt kapítalískt þjóðskipulag, en alls ekki sósíalíska samfélagsvæðingu í neinni mynd, og má af því ráða siðferði og heiðarleika þessara vesalinga.

Svo mikið er víst, að útgerðarauðvaldinu og öðrum auðvöldum á Íslandi stafar engin hætta af VG, enda er VG vígður samherji auðvaldsins, sem kann best við sig við rúllettuborð kapítalismans. Hið sama er að segja um hina stjórnarandstöðuflokkana. Ef eitthvað er, þá stafar auðvaldinu meiri hætta af samtökum Sigmundar Davíðs og Bjarna Ben því að þau eru mikið vísari með tiltektum sínum til að espa almenning til uppreisnar eða jafnvel byltingar.

Líf gagnrýnir heimsókn í kirkju

Athugasemdir

[Ómar Geirsson, 10.12.2014 kl. 20:35]

Magnaður pistill Jóhannes.

Og stórskemmtilegur.

Kveðja að austan.

[Jóhannes Ragnarsson, 10.12.2014 kl. 21:21]

Takk fyrir, Ómar.

[Árni Gunnarsson, 11.12.2014 kl. 21:07]

Mikið er notalegt að lesa pistla eftir menn sem hafa komið sér upp flokkspólitísku frelsi.
Hvernig stendur á því að fjöldi prýðisgreinds fólks gerir sig fyrirhafnar-og umsvifalaust að flónum þegar það tekur til máls um pólitísk efni?
Af því að það telur sér skylt að stökkva til eins og vel vandir heimilisrakkar þegar það sér hallað á FORYSTU flokksins sem það ánetjaðist í æsku?
"Ung var ek gefin Njáli"!