Stórsigur Landhelgisgæslunnar.

Mikið gríðarlega erum við Íslendingar lánsamir að eiga svona öfluga og haukfrána skipherra hjá Landhelgisgæslunni. Það er auðsjáanlegt, að jafnvel hin minnsta hreyfing á miðunum fer ekki framhjá þessum herrum. Svo skulum við vona að refsivaldið hlífi ekki hinum lögbrotshneigða trillukarli og hann fái makleg málagjöld upp á vatn og brauð.

Í ljósi þessa stórbrotna atburðar, er allur áróður og lygar um svokallað ,,brottkast" á miðunum dauður og ómerkur - endanlega. Hefði slíkt átt sér stað, er morgunljóst að það hefði ekki farið framhjá Landhelgisgæslunni og því síður Veiðieftirliti Fiskistofu.

 

Bátur staðinn að meintum ólöglegum veiðum í Faxaflóa

Athugasemdir

[Níels A. Ársælsson., 9.4.2007 kl. 21:20]

Húrra fyrir Landhelgisgæslunni. Nú verður forseti vor að bregðast skjótt við og bjóða til opinbers samsætis á Bessastöðum. Það er algjörlega þjóðhagslega nauðsynlegt að hengja "Stórriddarakrossa" á hina vösku sveina gæslunnar sem af slíkum myndarbrag og snarræði tókst að koma böndum á þennan dóna. 

[Jóhannes Ragnarsson, 9.4.2007 kl. 21:35]

Já, og líklega verður hr. Ólafur að opna þrælakistuna, sem sagt er frá í Íslandsklukkunni, því varla er annar staður boðlegur veiðþjófnum atarna.

Varðandi Stórriddarakrossa, vil ég einungis minna á orð Magnúsar sáluga Kjartanssonar, er hann mælti af gefnu tilefni: ,,Áður fyrr voru ræningjar hengdir á kross, en nú eru krossar hengdir á ræningja." 

[Níels A. Ársælsson., 9.4.2007 kl. 21:48]

Verðum að vona að þetta eigi ekki við "kvótafíklana" og að þeir verði nelgdir á krossa en ekki öfugt þegar stjórnin verður fallin.