Eigi skal gráta Björn bónda, heldur safna liði og hefna

Það þarf aunginn að ganga að því gruflandi, að Eyjamenn vilja aungann fémínísm, sósíalism, anarkism, hvað þá kommúnism eða hómósexúalism. Þessi athyglisverðu sjónarmið Eyjamanna hefði fröken Stella Brím átt að vera búin að kynna sér áður en hún stormaði út þangað í sollinn og sódómuna.

Í eina tíð, fyrir löngu síðan, höfðust margir róttækir sósíalista við í Vestmannaeyjum, eiginlega svo margir að auðvaldsdrjólum og fylgifiskum þeirra stóð megn stuggur af. Ekki bætti úr skák, að sumir þeirra manna, er uppfullir vóru af kommúnism, teljast meðal alfrægustu Eyjamanna fyrr og síðar, þannig að raun auðvaldssinna var bæði sár og þung. Sem betur fer tókst útvegsbændum og athafnaskáldum, að hreinsa eyjarnar af sósíalismus og gera þær að einu vellandi auðvaldshelvíti. Það er nú það.

Og Eyjamenn eru hreintrúaðir í mammonismanum og taka hart á öllum ismum, sem þeir telja að samrýmist ekki hinni sönnu trú. Þessvegna tóku þeir í lurginn á Stellu Brím fémínísta og létu hana finna til tevatnsins að sjómannasið. En svona okkar á milli sagt, þá ætti fémínístaforinginn Stella Brím ekka að gráta nokkrar skeinur á skrokknu eftir öfgafulla auðvaldsdindla í Eyjum. Ólöf in ríka eyddi ekki lögngum tíma í að gráta Björn bónda sinn eftir að hann var hogginn í spað í Rifi á Snæfellsnesi heldur safnaði liði til hefnda. Nú stendur uppá Stellu Brím, að fara að dæmi hins mikla kvenskörungs, Ólafar ríku, að safna að sér her manns og steðja út til Eyja og fella andskotans auðvaldið þar og reka það útí hafsauga. Ég er meira að segja viss um, að henni mun reynast létt verk, að afla sér liðveislu, sennilega nokkrum óvinnandi herfylkjum, til að jafna um óvininn.

Spörkuðu og kýldu vegna femínisma

Athugasemdir

[Kristbjörn Árnason, 3.8.2015 kl. 20:42]

Mér líkar vel við þessi skrif, einnig orðavalið. Þótt Tjörfi Kristjánsson (sonur Stjána blá) hafi þurft að berjast fyrir framan gamla samkomuhúsið við ánna forðum til að ná til móðursystur minnar.

Þá finnst mér ekki að slagsmál sé séstakur sjómannasiður. Það er bara gamalt rugl hjá hommahöturum í eyjum. 

En getur ekki verið að ég hafi séð þig á förnum Laugavegi á dögunum?

[Jóhannes Ragnarsson, 3.8.2015 kl. 21:15]

Ég gekk síðast um Laugaveginn fyrir tveimur mánuðum. Hinsvegar var ég á Austurvelli laugardaginn 25. júlí og hlustaði á ræður helgaðar Druslugöngunni.

[Borgþór Jónsson, 4.8.2015 kl. 02:09]

Ertu virkilega að leggja til að frelsisher Norður Kóreu verði blandað í málið?

Fyrr má nú rota en dauðrota.

[Jóhannes Ragnarsson, 4.8.2015 kl. 08:28]

Þú hefir, þykir mér, aldeilis hugarflug, Borgþór. Hvað hemur þér til að halda, að ég sé að leggja til, að einhverjum frelsisher Norður Kóreu, eða Norður Kóreu yfirleitt, verði blandað í málið?

[Jens Guð, 5.8.2015 kl. 22:08]

Eigi skal gráta Björn bónda heldur salta í tunnu.