Sérlega traustvekjandi þegar kapítalíska loddarakaðrakið fer á lóðarí

Það verður að telja sérlega trúlegt og traustvekjandi þegar kapítalistarnir í stjórnarandstöðunni plampa í sameiningu upp með breytingartillögur við fjárlög kapítalistanna í ríkisstjórninni. Þetta undursamlega loddaratrikk er auðvitað vel þekkt hjá undirmálskvikindum í stétt lélegra sjónhverfingafúskara og trúðfífla. Auk þess fer sjórnarandstöðuliðinu herfilega illa að reyna að skíta í súpuna hjá Framsóknaríhaldinu, því það meinar vitaskuld ekkert með þessum góðgerðaleiksýningu sinni, það vita allir sem á annað borð vilja vita.

Hinsvegar er brýn nauðsyn á að sameina flokkaklíkur stjórnarandstöðunnar á einn stað og eyða þeim eins og hvimleiðum pöddum, svona í líkingu við það þegar síra Snorri á Húsafelli safnaði púkastóði, sendingum og öðru draugamori í Borgarfirði saman í túnfótinn hjá sér og kom þeim fyrir undir stórum steini í horni fjárréttarinnar á staðnum. 

Kolbeinn Kolbeinsson, sem er allt í senn skrifstofustjóri framsóknarmaður og djúphugsuður, segir, að affarasælast væri að stjórnarandstöðuflokkarnir sameinuðust Framsóknarflokknum svo úr yrði stór og voldug glæpaklíka sem ætti í fullu tré við bófaklíkuna sem kennir sig við sjálfstæði og segjast vera í forsvari fyrir frelsi og lýðræði landinu. Kolbeinn segir, að slík sameining myndi auk þess frelsa sósíalista landsins frá því að burðast með loddarakaðrak stjórnarandstöðunnar í farteskinu þannig að þeir gætu snúið sér að alvöru sósíalisma án þess að brunnmígar Smafylkingar, VG, Pírata og Björtu framtíðarinnar hans Gvöndar séu sífellt og endranær að koma óorði á stjórnmálastefnu sósíalista.

16 milljarðar út, 17 milljarðar inn