Góð landkynning að leyfa Amríkönum að sjá fanga éta steikur og kneyfa vín

Það er ekki nema sjálfsagt og eðlilegt að Mikjáll Múr fái að mynda hvernig eðalfangar á Íslandi kneyfa rauðvín og éta steikur í dýflissunni til að sýna Amríkönum hvernig koma á fram við fanga. Að umboðsmaður Alþingis sé að snuðra í soleiðis hlutum er auðvitað afleitt og ber vott um átjándualdarhugarfar. Svo hefði verið ósköp gaman ef Mikjáli kvikmyndagerðarmanni hefði borið gæfa til að mynda reiðnámskeið fanga, sem illu heilli var af slegið af mannvonsku einskærri.

Vitað er fyrir fyrir víst að hvurgi er betra að taka upp menningarlegar fangelsismyndir en á Kvíabryggju þar eð birtuskilyrði þar eru slík að aumustu refsfangar líta út eins og bánkagróssérar og mikilsvirtir útvegsbændur. Svo er alltaf fróðlegt að heyra hvernig fangar tala um aðra fanga af þessum unaðslega kærleik sem brestur á þegar menn eru mettir af rauðvíni og nautasteik. Niðurstaðan er því sú, að upptaka Mikjáls á ástafari og neysluvenjum kvíabryggjufanga er ekkert minna en þjóðþrifaverk og framúrskarandi landkynning.

Mátti Moore mynda á Kvíabryggju?

Athugasemdir

[Anna Sigríður Guðmundsdóttir, 11.1.2016 kl. 13:20]

Það þykir kannski mannsæmandi dómsstólameðferð á Íslandi, að meðhöndla reglugerðar-ruglsins misnotuð fangelsuð fórnarlömb Páfaheimsmafíu-kjólfata-höfuðpauranna allsráðandi og ósnertanlegu, á þennan ómennska og siðmenntaðra dómsstólaríkja óverjandi hátt.

Vill dómstólanna/embættanna/lögverjandi spillingarfólk ekki bara dæma fanga til dauða á kvalarlausan og óniðurlægjandi hátt, frekar en að stunda svona andlegt ofbeldi? Andlegt ofbeldi samræmist ekki siðmenntuðum og mannúðlegum betrunarkröfum um meðferð fanga. Sama hvaða nafn fanginn ber.

Það eiga allir að vera jafnir fyrir lögum hjá siðmenntuðum réttarríkjum. Ráðherrar, rónar, og allt þar á milli!

Til hver eru fangelsi á Íslandi og víðar í villimannastýrðri veröld höfuðpaura-Páfanna ósnertanlegu?

Það getur víst enginn svarað því á siðmenntaðan og hefndarþorstalausan, heilbrigðan og mannúðlegan hátt, til hvers fangelsi heimsins (að meðtöldu Íslandi) eru gagnleg og samfélags/mann-bætandi.

Rándýr, "lögleg"/lögleg, siðlaus, mannréttindalaus, ómennska, sama hvernig á dómsmál Íslands er litið.

M.b.kv. 

[Níels A. Ársælsson., 15.1.2016 kl. 09:57]

Hólmfastur Guðmundsson var nú ekki að velta fyrir sér svona smámunum í dyflissunni á Bessastöðum en átti þá ósk heitasta að vera höggvinn frekar en að hljóta þá smán að vera hýddur. 

Jafnvel lítill karl verður maður af því að vera höggvinn sagði hann. Lítill karl getur farið með vísu um leið og hann er leiddur undir öxina. Aftur á móti verður hver maður lítill á því að vera hýddur," sagði Hólmfastur.