Því þambaði hún ekki bjórinn áður en hann féll á tíma?

Það er sorglegra en tárum taki að Brynhildur Pétursdóttir skuli ekki hafa þambað allan jólabjórinn sem gekk af fyrst henni þykir svona mikil sóun af því að hella honum niður. Þessístað rambar hún eins og vofa uppí ræðupúlt Alþingis og hrín yfir því óréttlæti heimsins að jólabjór megi aðeins drekka á jólum annars skuli honum sturtað í holræsið. Þó held ég hafi lyfts örlítið á henni brúni þegar fjármálaráðherra fór að gráta með henni þó svo hann hafi ekki, svo menn viti, reynt að dæla í sig afgangsbjórnum sem var tortímingunni að bráð.

Annars þarf enginn að hafa áhyggjur af afdrifum jólabjórsins sem landsmönnum tókst ekki að drekka sig vitlausa af. Hinn útrunni jólabjór fór nefnilega að stórum hluta í áfengisgeymslu frú Ingveldar og Kolbeins Kolbeinssonar skrifstofustjóra og framsóknarmanns og á þeim bæ er áfengi ekki hellt niður viljandi. Afgangurinn lenti svo í öruggum höndum fólks eins og Máríu Borgargagns og Indriða Handreðs, Brynjars Vondulyktar og Óla Apakattar. Og á ýmsum útvöldum stöðum til viðbótar er enn verið að skála í jólabjór.

Já það er sannarlega hryggilegt að þingdraugum með grátstaf í kverkunum skuli ekki hafa auðnast að slafra í sig öllum þeim jólabjór sem framleiddur var fyrir síðustu jól. Það bendir til að ekki fylgi mikil einurð gráthljóðum þeirra. Sem betur fer er stutt í páskabjórinn og þá fær frú Brynhildur Pétursdóttir, sem og hinn grátbólgni fjármálaráðherra, tækifæri til að sanna hvað í þeim býr þegar baráttan verður hvað hörðust við að klára ölið áður en það fellur á tíma og hverfur klókainu á vald.

Fáránleg sóun á jólabjór

Athugasemdir

[Kristbjörn Árnason, 21.1.2016 kl. 14:36]

Ég sé að þú ert lausnamiðaður og lausnir núna minna nokkuð á afdráttarlausar lausnir Lúðvíks Jósepssonar. Þegar hann var spurður um það í sjónvarpi hvernig ætti að eyða svonefndu kjötfjalli.

Lúðvík sagði það mjög einfalt. Bara éta það. 

[Kristbjörn Árnason, 21.1.2016 kl. 14:39]

Bjórnum hefði að sjálfsögðu mátt hella í svín. Hann hefði eflaust gert þeim bara gott eitt. Fyrir utan það hvað þeim hefði getað liðið vel í stíum sínum.

[Jóhannes Ragnarsson, 21.1.2016 kl. 15:29]

Svo er mér sagt að bjór sé kjördrykkur ofaní bolakálfa sem aldir eru upp í nautaket. Hamborgarar úr þessháttar gripum eru víst engin fantafæða.

[Sindri Karl Sigurðsson, 22.1.2016 kl. 00:12]

Tja og síðan má velta því fyrir sér hvort jólabjór geti talist jólabjór á páskum... og páskabjór standi undir nafni á aðventunni.

Því er ávallt haldið fram að vatn renni auðveldustu leiðina, kannski það eigi við ölið einnig.