Ekki er kyn þótt keraldið leki

Íllt er það allt og bölvað þetta lúxusvandamál sem píratagarmarnir hafa ratað í hér í Norðvesturkjördæmi. Það kom sem sé á daginn að einn rummungsfóli hafði gefið kost á sér í prófkjöri píratana og haft sigur með ófyrirleitnum bolabrögðum. Í pírataslóðum er það nefnilega höfuðglæpur frambjóðanda í prófkjöri af fá systkyni og vini til að ganga í flokkinn til að kjósa sig og talið bera vott um siðleysi, siðvillu, siðbilindu og siðkrabba af langsíðustu sort. Hinsvegar er pólitískur ruglandi álitinn dyggð þar á bæ, svo sem eins og að vísa sí og æ í svokallaða ,,grunnstefnu" pírata þegar viðkomandi pírati hefur ekki hugmynd um hverju hann á að svara þegar hann er spurður um eitthvað sem tengist flokknum. En ,,grunnstefna" pírata er mikið framsóknarvers, opið í alla enda og eftir þörfum hvers og eins til útúrsnúninga.

Yfirpíratinn er svo náttúrlega vandamál útaf fyrir sig, en samt ekki það merkilegt að hægt sé að kalla hana lúxusvandamál, öðru nær. Holtaþokunagg og hefðbundinn leikaraskapur af gynnri tegundinn er aðall þessa yfirpírata og leiðarljós. En þegar hjartahreinn einfeldningur, sem yfirpírötunum er í nöp við, tekur þátt í prófkjöri og fær systkyni og vini til að kjósa sig er hann sleginn af með fáheyrðu offorsi og hroka. 

Pírataflokkurinn er gnarristaútafan af veslings Framsóknarflokknum, líkur foreldri sínu á fjósbásnum nema að því leyti að hann er ennþá rennblautur bak við eyrun og eins er eitthvert ólag á hlandfærum hans, þvagið safnast víst saman í líkamanum eins og hjá hákarlinum, sem þekktur er fyrir að vera hlanblöðrulaus og míga inní sig og er baneitraður þar til hann er búinn að liggja 12 ár í fjóshaugi. Þar skilur á milli gömlu Stóru-Framsóknar og Pírataframsóknar. Og á sama hátt er Viðreisn óæðri endinn á Sjálfstæðisflokknum. Þannig ber allt að sama brunni í líffræði hins kapítalíska sexflokks á Alþingi og því ekki kyn að keraldið leki.

Felldu framboðslista í NV-kjördæmi