Þjóðlegur átrúnaður á Trump hafinn á Íslandi - öndvegissúlur brátt sjósettar

Bölvað ekkisens svínarí er það sem illar tungur mæla um ástmögur Íslensku þjóðfylkingarinnar, Sjálfstæðisflokksins, Framsóknarmaddömunnar, Flokks fólksins og Viðreisnar. Dónaldur Trump, þessi opni og einlægi ljúflingur, má þola ógurlegan rógburð um meinta ofsagreddu, káf og nauðgunartilburði. Illa munu aðdáendur, þessa merka þýsk/skoska bandaríkjaforseta, hér á landi trúa svona ruddasögum uppá sinn mann. 

Daginn eftir að Dónaldur var kosinn, tóku frú Ingveldur og Kolbeinn eiginmaður hennar sig til og hengdu stóra litmynd í hátimbruðum ramm af Dónaldi uppá stofuvegg á heimili sínu. Daginn þar á eftir útbjó frú Ingveldur dulítið altari fyrir framan myndina og nú falla þau hjón og vinir þeirra á knén frammi fyrir Trump og gjöra bænir sínar til hans. Þá hafa sæmdarhjónin ráðið sé myndlistarmann til að gjöra líkneski úr tré af Dónaldi, því trúin á þann mann er allt í senn: kaþólsk, múhámeðísk, ásatrúar og mammonsk. Þau frú Ingveldur og Kolbeinn segjast nú þegar hafa verið bænheyrð af hinum nýja drottni, sem kom fram með þeim hætti að þau fundu fjórar flöskur brennivíns í einhverju skúmaskoti heima hjá sér á mánudagsmorgun eftir að hafa í timburmönnum sínum snúið bæn sinni til Dónalds, að hann færði þeim góða lækningu við timburmönnunum nú þegar.

Þá hafa garparnir í Íslensku þjóðfylkingunni, sem gárungarnir hafa uppnefnt og kalla Íslamísku sóðafyllinguna, skorið Dónald út í öndvegissúlur, sem þeir hyggjast fara með útá miðjan Faxaflóa og sleppa þeim þar lausum. Standa vonir þeirra til, að súlur þeirra í Trumpslíki beri þar að landi sem gott er undir bú. Þar ætla þeir að helga sér land samkvæmt fornum aðferðum og reka alla þá er innan þeirra vébanda kunna að búa í brott eins og hvurja aðra leiðinlega Palestinuaraba eða Mexíkóa. Með þessum brögðum hyggjast þjóðfylkingarpaurar leggja grundvöll að þjóðlegu frumíslandi í anda Ingólfs Arnarsonar og Skallagríms Kveldúlfssonar. 

Stóð aldrei við það sem hann sagði