Það sem allir góðir menn ættu að geta verið sammála um

Mér er sagt að þetta sérkennilega félag, sem kallar sig Gamma, sé tengt dýrafræðinni, þá einkum undirdeild hennar fuglafræðinni og sitji það saman á priki innan um hrægamma. Á erlendum málum heitir þessi tegund fuglafræðinnar ornithology tortolusis og hefur, að sagt er, eitthvað með fjármálabrask að gera. Hver munur á Gamma og hrægömmum er má fjandinn einn vita, en allt um það er eitthvað óhuggulegt við þessi býsn. Minningarnar frá árinu 2008 og næstu tæpa tvo áratugi þar á undan æða eins og brotsjór að manni þegar þar er frá skýrt, að Gamma sé að undirbúa brasksjoppur á Englandi og Írlandi til að veiða þarlenska péníngaglópa í einskonar icesavegildru. Á sama tíma eru íslenskir leigendur arðrændir uppí rjáfur til að sleppa við að lenda á vergangi.

Það kemur fram í fréttum, að umsvif Gammsins á Bretlandseyjum er háð fyrirhugaðri losun gjaldeyrishafta, sem gefur fullt tilefni til að slútta þeirri fyrirhuguðu losun að minnsta kosti til eilífðarnóns. Ég geri fastlega ráð fyrir, að Katrín Jakobsdóttir láti verða sitt fyrsta verk, eftir að hún er orðin forsætisráðherra og Bjarni Ben kominn í einangrun í súrheysturni Stjórnarráðsins, að taka gammfugla af válista með fyrirhugaða eyðingu á þeim fiðurfénaði að markmiði.

Einnig má ljóst vera, að þjóðþrifaverk númer eitt hjá þjóðinni í þessum tímapunkti ætti að vera, ef þjóðin er þá ekki firrt útyfir allan þjófabálk, að segja braskónáttúrunni í þjóðarsálinni stríð á hendur og láta ekki staðar numið fyrr en hún er á bak og burt. Þó svo að hagspekingar heimskunnar mæri ,,heilbrigða samkeppni," ,,markaðslausnir," ,,ósýnilegu hönd markaðarins," hagvöxt, kaupmátt, vísitölur og annan óþverra í þeim dúr, þá er meira aðkallandi en flest annað, að þessháttar ,,akademisk" drepsóttarskaðmenntun verði meðhöndluð eins og hvur önnur glæpasamtök og slegin af. Það ættu allir góðir menn að geta verið sammála um.   

Sjóðir á Írlandi sérhæfa sig í Íslandi