Jóhannes Ragnarsson

18.11.2016 | 19:07

Besti heimur allra heima

Meðan Katrín baukar við að efna til samtala og orðræðna við díngalíngflokkana, fundar yfirformaður VG ásamt fullorðna fólkinu í þeim flokki stíft og grimmilega með Bjarna Ben, Stjána Júl, Sigurði Inga og litlu ungfrú Alfredo, - meira að segja Sigmundur Dávíð fær endrum og sinnum að vera með þó hann hafi reynst hörmulega mislukkaður. Af einhverri ástæðu, eða slysni, er herbergið sem Steingrímur fundar með vinum sínum alltaf fullt af reyk svo þykkum að vart sér handa skil. Af þessu geta kjósendur séð, að Steingrímur og Kata eru aðalparið í hrunadansinum. Þau eru svo klók, að hvernig sem dansinum lyktar þá fær Steingrímur allt að einu alltaf ráðherrastól til að verma sinn bláa botn.

Það væri náttúrlega best, að VG tækist með yfirburðaþekkiningu sinni og stórbrotnum talfgáfum sem þar eru til staðar, að ekki aðeins Steingrímur fái ráðherrastól, heldur og að Álfheiður sjálf og Svavar Sendiherra fái slíka stóla til afnota, - Kata litla fengi að færa þeim kaffið á morgnana og fara í sendiferðir fyrir þau á einhverjum ráðherrabílnum. Á þann hátt, - og aðeins á þann hátt, - væri réttlætinu fullnægt. Á meðan geyspar auðvaldið af offylli, afslappað og glottandi, en það rólegheitaástand stafar af því, að auðvaldinu er andskotans sama með hvoru framsóknaríhaldinu VG fer í ríkisstjórn, því nýja eð því gamla.

Fyrir fáeinum mánuðum hefði aungvann órað fyrir því að svo mikil hamingja félli VG í skaut á aðventunni. Mikilvægastur er auðvitað ráðherrastóllinn, sem Steingrímur fær óhjákvæmilega í skóinn sinn. Næst mikilvægast er að braskaralýðurinn fær að fara sínu fram hvernig sem ráðherrastólarnir skiptast að öðru leyti. Þetta er að sönnu dásamlegt og sýnir, svo ekki verður lengur um villst, að á Íslandi er besti heimur allra heima og skör hærra sett en þetta Hymmnaríki, sem allir keppast við að komast í eftir dauðan, þótt sárafáum heppnist innganga þar. Enda er að verða viðhorfsbreyting úti í hinum stóra heimi varðandi æskilegan áfangastað þegar jarðvist líkur því að æ fleiri óska þess nú og keppast við að komast frekar til Íslands en Hymmnaríkis eftir að maðurinn með ljáinn hefir sniðið af þeim hausinn.